Pynleit jingmut ka NESFAS ban pynneh ia ki symbai tynrai ha ka jaka jong ki hybrid

Syllad | The Rising MeghalayaAugust 9, 2023

Ka North East Slow Food and Agrobiodiversity Society (NESFAS) ka dang iai bteng ban pynleit jingmut na ka bynta ban pynneh pynsah ia ki symbai jingthung tynrai namar ki jingeh kiba mih lyngba ka jingmih ki symbai kiba shu shna ne pyniakhleh (hybrid) lane ki symbai ba la pynmih lyngba ka Genetically Modified Organism (GMO) na ka bynta ka rep ka riang.

Halor kane ka bynta ka NESFAS ryngkat ka Meghalaya Basin Management Agency (MBMA) ki la pynlong da ka state-level workshop halor ka mat “Agroecology Learning Circles and natural resources management under the Community Led Landscape Management Project (CLLMP),” ha kane ka sngi ba Ar ba la lah hapoh U Soso Tham auditorium ha kaba la wan ban iashim bynta da ki nongrep na kylleng ka jylla Meghalaya.

Na ka liang u Bah Pius Ranee, Executive Director ka NESFAS ha ka jingkren u la kdew halor ki jingma ia ki symbai tynrai jong ki trai shnong namar ka jingdon kyrhai jong ki symbai ba la shu khleh ki bym lah satia ban pynneh slem slem.Ka NESFAS ka kiar na kaba pyndonkam ia ki symbai hybrid bad GMO hapdeng ki nongshong shnong kiba dei ki trai shnong bad ka don ruh ia ka jingthmu ban iatreilang bad ki saiantis na ka bynta ban kyntiew ha kaba iadei bad ka jingpynmih ia kine ki symbai tynrai.

Hapoh kine ki ar snem ka jingiatreilang bad ka World Bank, ka NESFAS ka la pyntreikam ia ki projek kiba iadei katkum ki jingtip kiba iadei bad ki rukom rep tynrai lyngba ka jingmir jingmut lang bad ki riew shemphang na ka bynta ban pynkup bor shuh shuh ia ki nongrep.

Da kaba pynpaw ba ka jingiakhleh lang ia kiba kum kine ki jingtip kaba wanrah ka jingkyrmen ha ka rep ka riang, u Bah Ranee u la ong; “Kine ki jingnang jingtip tynrai kiba ki nongrep lehse ki la pule bniah naduh ki kpa tymmen ki jong ki.Ka jingiakhleh lang ia ki jingtip tynrai bad kane ka juk ba mynta kan iarap ban weng ia ki jingeh kiba iadei bad ka rep kariang.Ha ka jingiaid lynti ka jong ngi, ngi la shem ba ki don haduh kumba 2000 ngut ki nongrep kiba pyrshang ia kiba kum kine ki rukom ha ka liang ka rep ka riang.”