Pynliem ka Lajong ia ka Sawmer da 4-0 ban ioh rung syndon sha ka semifinal ha ka Shillong Premier League

Syllad | The Rising MeghalayaApril 28, 2024

Ka Shillong Lajong FC ka la kylla long ka kynhun kaba lai ka ban ioh rung sha ka semifinal ha ka lympung ialehkai Shillong Premier League hadien ba ka la lah ban pynliem noh ia ka Sawmer SC haduh 4-0 ha ka jingialehkai kaba la long ha ka 27 tarik Iaiong ha madan SSA Stadium, Polo, Shillong.

Hadien ka jingiakhun kaba la kynjoh sha ka sien kaba hynriew, ka Lajong ka la ioh ban khur 12-point bad duna tang shi point ia ka Mawlai SC kaba don mynta ha ka kyrdan kaba ar ha kane ka lympung ialehkai, katba ka Sawmer ka la sahkut ha ka 3 point bad duh noh ia ka lad ban ioh rung sha ka semifinal.

Naduh kaba sdang jong ka jingialehkai, ka Shillong Lajong ka la lah ban banbor pyrshah ia ka Sawmer bad ioh ban thep ia ka kol kaba nyngkong tang mar ia sdang ka jingialehkai, kata ha ka minit kaba 14 lyngba u Deibormame Tongper.

Hadien u Wadajied Kynsai Ryngkhlem u la ioh ban pynkhih jar na ka bynta ka Lajong ha ka minit kaba 18 bad hadien u la ioh ban thep biang sa shi kol ha ka minit kaba 77. Katba u Gladdy Kharbuli u la ioh ban pynkhih jar ha ka minit kaba 24.

Ka jingialehkai ha ka sngi Nyngkong kan long kaba itynnad bha hapdeng ka Rangdajied United FC pyrshah ia ka Langsning FC ha ka por 3:15 nohphai sngi.

Ka Rangdajied mynta ka la don ha ka kyrdan kaba nyngkong lyngba ka jingjop kaba hynriew sien kynthih bad kaba la ioh rung da kaba suk sha ka semifinal, katba na ka liang ka Langsning kan hap ban iakhun tyngeh khnang ban pynthikna ba kan dei ka kynhun kaba khatduh ka ban ioh rung sha ka semifinal.