Pynliem ka Langsning FC 5-1 ia ka Nongthymmai haka lympung ialehkai Shillong Premier League

Syllad | The Rising MeghalayaApril 26, 2024

Ka Langsning FC ka la lah ban pynliem noh ia ka Nongthymmai SC haduh 5-1 ha ka lympung ialehkai Shillong Premier League kaba la long ha madan SSA Stadium, Polo Shillong haka 25 tarik Iaiong.

Ka jingialehkai ha ka kylla step ka la long kaba mar iakhaid bha ha kaba ym shym la don satia ki ban ioh lad ban pynkhih jar watla ka la don ka jingpyrshang na baroh arliang.

Hynrei haba wanphai sha ka kylla miet ka Langsning ka la kham lah ban banbor ha kaba u rangialehkai shakhmat jong ka u Sheen Sohktung u la ioh ban pynkhih jar ha ka minit kaba  55 bad hadien ha ka minit kaba 90+1. U Nelson Rymbai u la ioh ban thep ia ka kol ha ka minit kaba 59 katba u Kitboklang Palei ha ka minit kaba 64 bad u Dawandappura Biam Pathaw u la ioh ban thep ha ka minit kaba 70.

Na ka liang ka Nongthymmai SC ka la iaksaid dohiap bad ioh ban thep shi kol lyngba u Andyson Lapang ha ka minit kaba 77.

Lyngba kane ka jingjop ka Langsning mynta ka la ioh 9 point bad iakhaid bad ka Shillong Lajong FC, hynrei namar ka Lajong ka la kham tam ha ka jingioh thep kol kumta ka la wan ha ka kyrdan kaba lai bad ka Langsning ha ka kyrdan kaba saw.

Ka Nongthymmai SC ka la neh ha ka lai point bad ka la duh noh ia ka kabu ban iakhun na ka bynta ban ioh rung sha ka semifinal.

Baroh baroh mynta ki la phaikhmat sha ka jingialehkai ka ban long lashai ka 26 tarik sngi Thohdieng hapdeng ka Rangdajied United FC kaba la kamai 15-point bad ka Mawlai SC kaba wan ha ka kyrdan kaba ar bad kaba la kamai 13-point bad ki ban iaknieh ban ioh bat ia ka kyrdan kaba nyngkong, kata ka ban long ha ka por 3:15 nohphai sngi.