Pynliem ka Langsning FC ia ka Rangdajied 6-0 ban ioh rung sha ka semifinal ha ka Shillong Premier League

Syllad | The Rising MeghalayaApril 30, 2024

Ka Langsning FC ka la lah ban pynjem khnap pyrshah ia ka Rangdajied United da kaba thep haduh 6-0 ha ka lympung ialehkai Shillong Premier League kaba la long haka 29 tarik Iaiong, ha madan SSA Stadium, Polo Shillong bad kylla long ruh ka kynhun kaba khatduh ban ioh rung sha ka semifinal.

Kane ka jingialehkai ka dei kaba kongsan bha na ka bynta ka Langsning khnang ba kan ioh ban rung sha ka semifinal, katba ka  Rangdajied ka la dei lypa ka kynhun kaba la don ha ka kyrdan kaba nyngkong bad kaba la ioh rung lypa sha ka semifinal, bad kumta ruh kala pynmih bun ngut da ki rang ialehkai ki bym pat da tbit bha ha kane ka jingiakhun.

Watla katta kane ka dei ka sien kaba nyngkong ba ka Rangdajied ka la mad ia ka nam rem naduh kaba sdnag jong kane ka lympung ialehkai khlem da ioh ban khur point.

Ha kane ka jingiakhun u rangialehkai shakhmat ka Langsning u Nelson Rymbai u la ioh ban thep hattrick ha ka minit kaba 57 P, 79 bad 90+2 P, kata artylli lyngba ki penalty, katba u Kitboklang Pale u la ioh ban pynkhih jar ha ka minit kaba 45, u Overkindness Lyngdoh Mawnai ha ka minit kaba 60 bad u Sheen Sohktung u la ioh ban thep ha ka minit kaba 69.

Da kane ka nam jop ka Langsning ka la ioh 12 point bad iakhaid bad ka Shillong Lajong FC. Nalor ka Rangdajied kaba don ha ka kyrdan kaba nyngkong, kiwei pat ki team kiba don ha ka top 4 kin dang hap ban ap namar ki dang don ia ki jingialehkai kiba ki dang hap ban iakhun.

Ka jingialehkai haka 30 tarik Iaiong, kan long hapdeng ka Sawmer SC bad ka Nongthymmai SC ha ka por 3:15 nohphai sngi.