Pynliem ka Mawlai SC ia ka Langsning da 1-0 ha ka jingialehkai Shillong Premier League

Syllad | The Rising MeghalayaMarch 29, 2024

Ka Mawlai SC kaba dei ka lahduh ha ka samoi ialehkai ba la dep ka la ioh ia ka jingjop kaba nyngkong ha ka jingialehkai Shillong Premier League 2023 kaba la long haka 28 tarik Lber, ha madan  SSA Stadium, First Ground Polo, Shillong da kaba pynliem noh ia ka Langsning FC da 1-0.

Ia kane ka kol la ioh ban thep ha ka minit kaba 10 jong ka kylla step da u Dajiedlang Wanshnong. Kane ka lahduh jong u snem 2022 ka la lah ban ialehkai bha naduh kaba sdang bad kaba la pynshem jingeh shibun ia ki rangialehkai ka Langsning watla ki la ioh katto katne ki kabu hynrei ki bym lah ban lah ban seisoh.

Ka Mawlai bad ka Langsning ki la ia bujli ia ki coach hashwa jng kane ka lympung ialehkai SPL 2023, ha kaba u Bah Khlain Pyrkhat Syiemlieh u la leit ban pyniasoh sha ka Langsning katba u Bah Hering Shangpliang u la iasoi ban ialam ia ka Mawlai.

Ka jingialehkai ha ka kylla miet ka la iaid suki ha kaba baroh arliang ki la pyrshang ban thaw ia ki lad ban ioh pynkhih jar hynrei kam shym la seisoh satia kaba la pynlong ia ka Mawlai ba kan ioh ia ka jingjop lyngba katei ka shi kol.

Ryngkat ki 4 poin lyngba ki artylli ki jingialehkai, ka Mawlai kaba la iakhad bad ka Ryntih SC da 1-1 ha ka jingialang sdang, mynta ka la don ha ka kyrdan kaba lai, kata hadien jong ka Lajong FC bad ka Rangdajied United FC kiba la ioh mar 6 point.

Ka Langsning ka la don ha ka kyrdan kaba hatrai eh bad kam pat kamai wat tang shi poin.

Ka jingialehkai kaba bud kan long ha ka sngi Saitjain ka ban wan hapdeng ka Nongthymmai SC bad ka Ryntih ha ka por 3 baje janmiet.