Pynliem ka Mawlai SC ia ka Nongthymmai da 2-1 ha ka Shillong Premier League

Syllad | The Rising MeghalayaApril 13, 2024

Ka Mawlai SC kaba dei ruh ka lahduh jong ka samoi kaba la dep ka la lah ban pynliem noh ia ka Nongthymmai SC da 2-1 ha ka jingialehkai jong ka Shillong Premier League 2023 kaba la long haka 12 tarik Iaiong ha madan SSA Stadium, Polo Shillong.

Ia baroh ki 3 tylli ki kol ha kane ka jingialehkai kaba mar ia biang bor la thep tang ha ka kylla miet ha kaba u Dajiedlang Wanshnong u la ioh ban pynkhih nyngkong ia ka jar ha ka minit kaba 58 na ka bynta ka Mawlai, katba u Rabi Hansda u la ioh ban pyniakhaid na ka bynta ka Nongthymmai lyngba ka kol kaba u la ioh ban thep ha ka minit kaba 80.

Hynrei u Pynbha Suting u la lah ban pynskhem ia ka jingjop na ka bynta ka Mawlai da kaba ioh ban thep ha ka minit kaba 86 bad kaba la pynlong syndon ia ka Mawlai ba kan wan ha ka kyrdan kaba nyngkong ha kane ka lympung ialehkai bad kylla long ka team kaba nyngkong ka ban ioh 10 point bad ka bym pat shah rem hadien ki sawtylli ki jingialehkai, katba ka Nongthymmai ka la neh ha ka kyrdan kaba hynriew bad ioh 3 point.

Ka jingialehkai ka la long kaba itynnad bad kaba mar ia biang bor naduh kaba sdang jong ka jingialehkai kat haduh ban da kut ha kaba ym shym la don satia ki ban ioh ban pynkhih jar ha ka kylla step watla ki la don katto katne ki kabu na ka bynta jong ki artylli ki team. Hynrei haba wanphai sha ka kylla miet baroh ki arkynhun kila iakhun dohiap, hynrei ha kaba kut ka Mawlai ka la lah ban pynliem noh ia ka Nongthymmai SC da 2-1.

Ka jingiakhun lashai ka 13 tarik sngi Saitjain kan long hapdeng ka Rangdajied United FC pyrshah ia ka Shillong Lajong FC kiba don hapdeng ka jingmar ia ryngkat, kata mar  9 point lyngba ki jingjop kiba mar 3 sien.