Pynliem ka Mawlai SC ia ka Shillong Lajong da 5-0 ha ka SPL ban rung sha ka semi final

Syllad | The Rising MeghalayaApril 24, 2024

Ka Mawlai SC ka la ioh ban rung sha ka semi final ha ka lympung ialehkai Shillong Premier League hadien ba ka la lah ban pynliem noh ia ka Shillong Lajong FC da haduh 5-0 ha ka jingialehkai kaba la long haka 23 tarik Iaiong, ha madan SSA Statium Polo, Shillong.

Ka Mawlai SC ka la lah ban banbor naduh kaba sdang jong ka jingialehkai ha kaba ka la ioh ban thep ia ka kol kaba nyngkong ha ka minit kaba 12 jong ka kylla step lyngba u Fullmoon Mukhim.

Haba bteng ia ka jingialehkai ha ka kylla miet ka Mawlai ka la nang lah ban banbor shuh shuh pyrshah ia ki rang ialehkai jong ka Shillong Lajong ha kaba ka la ioh ban thep biang haduh sawtylli kol. Kine ki kol ki dei kiba la thep da u Kevin Rymbai ha ka minit kaba 47, u Brolington Warlarpih ha ka minit kaba 49 u Donlad Diengdoh ha ka minit kaba 72 bad u Romarius Laban ha ka minit kaba 76.

Lyngba ki 13 point kiba ka la ioh khut khlem pat shah rem shisien ruh, ka Mawlai SC ka la thikna ban don ha ka thup Top 4 jong ka round robin stage bad ruh ban ioh rung syndon sha ka semi final ha kane ka lympung ialehkai.

Katba ka Shillong Lajong FC kan dang hap ban iakhun sa artylli ki jingialehkai ha kaba kan hap ban jop ha baroh ki artylli ki jingialehkai khnang ban ioh rung sha ka semi final.  

Ka jingialehkai lashai ka sngi 24 tarik sngi Balang kan long hapdeng ka Ryntih SC pyrshah ia ka Sawmer SC ha ka por 3:15 janmiet.