Pynliem ka Nongrim Hills haduh 6-0 ia ka Ryntih FC ha ka Shillong Premier League

Syllad | The Rising MeghalayaDecember 29, 2024

Ka Nongrim Hills SC ka la lah ban pynliem noh da haduh 6-0 pyrshah ia ka Ryntih FC ha ka lympung ialehkai phutbol OC Blue Shillong Premier League (SPL) 2024 kaba la long ha ka 28 tarik Nohprah ha madan SSA Stadium, First Ground, Polo.

Ia kane ka OC Blue SPL la pynsangeh shipor namar ka jingleit iashim bynta ka kynhun ialehkai ka jylla ha ka Santosh Trophy bad namar ka aiom shuti, hynrei ia kane ka lympung la lah ban bteng biang haka sngi Saitjain.

Ki rang ialehkai ka Nongrim Hill kiba la ioh ban pynkhih jar ha kane ka jingialehkai ki kynthup ia u Nickhil Lyngkhoi (10’), Banshemphang Kurbah (38’, 67’), Benjamin Diengdoh (55’), Glennys Lynrah (81’) bad u Fashioning Syngkli (88’).

Kane ka dei ruh ka jingjop kaba lai sien kynthih jong ka club bad kaba la lah ruh ban thep bun kol, kata da 4-3 ia ka Langsning FC, 5-2 ia ka Nangkiew Irat SC bad mynta 6-0 pyrshah ia ka Ryntih FC.

Ka Ryntih ka dei ka kynhun kaba nyngkong eh ban pyndep ia ki jingialehkai ha ka first leg bad kaba la kut ha ka jingbynniaw hapdeng ki nongkyrshan jong ka. Ka Ryntih ka la sdang da ka jingjop kaba 3-0 pyrshah ia ka Nongthymmai SC, hynrei ka la bteng ban shah rem noh ha man ki jingiakhun kiba bud ha kaba kim shym la lah ruh ban thep kol ha ki laitylli ki jingialehkai ba la dep.

Hadien ka jingsangeh ba shipor na ka bynta ka shuti snem thymmai, ka OC Blue SPL kan sa wanphai biang ha ka 4 tarik u Kyllalyngkot 2025 lyngba ki artylli ki jingialehkai. Ha ka por 11:30 mynstep ka Rangdajied United FC kan iakhun pyrshah ia ka Nongthymmai, ban yn bud sa ka Mawlai kaba dei ka lahduh jong ka samoi ba la dep pyrshah ïa ka Laitkor SC ha ka por 2 baje nohphai sngi.