Pynliem ka Shillong Lajong da 2-1 pyrshah ia ka Nangkiew Irat ha ka SPL

Syllad | The Rising MeghalayaMay 2, 2024

Ka Shillong Lajong FC ka la lah ban pynliem noh ia ka Nangkiew Irat da 2-1 ha ka lympung ialehkai Shillong Premier League kaba long haka 1 tarik Jymmang ha madan SSA Stadium First Ground, Polo.

Ka jingiakhun ha ka kylla step ka la long kaba itynnad bad kaba mar ia biang bor, hynrei ka Shillong Lajong ka la ioh ia ka kabu ban pynkhih jar nyngkong lyngba u Mebannangkiew Thabah ha ka minit kaba 25.

Haba wanphai sha ka kylla miet, ka Lajong kaba la ioh mynsiem lyngba ka shi kol ka la lah ban kham banbor pyrshah ia ka Nangkiew Irat ha kaba ka la ioh ban thep biang sa shi kol lyngba u Samchaphrang Lato ha ka minit kaba 69. Hynrei, hashwa ban kut ka jingialehkai ka Nangkiew Irat ka la lah ban thep shi kol lyngba u Prashant Chettri ha ka mimit kaba 84.

Kine ki dei ruh ki kol kiba nyngkong eh na ka bynta baroh kine ki laingut ki rangialehkai ha baroh kane ka lympung kaba ki la iakhun.

Lyngba kane ka jingjop ka Lajong ka la wan biang ha ka kyrdan kaba ar lyngba ki 15-point, bad tam 2 kol ia ka Mawlai SC kaba dang don sa kawei ka jingialehkai pyrshah ia ka Nangkiew Irat. Katba ka Nangkiew Irat ka la neh sha trai jong ka miej khein point da tang 3-point, kata kaba iakhaid bad ka Nongthymmai SC.

Kane ka jingialehkai ka dei artad kaba khatduh eh na ki 28 tylli ki round robin match. Hynrei, namar ki jingpynsangeh kin dang don sa artylli ki jingialehkai kiba dang dei ban pyndep bad kine kin long ha ka 3 tarik sngi Thohdieng bad sngi Saitjain kaba bud.

Ha ka jingialehkai kaba nyngkong, ka Langsning FC kan ia aireng pyrshah ia ka Ryntih SC ha ka sngi Thohdieng, bad hadien ka Mawlai pyrshah ia ka Nangkiew Irat ha ka sngi Saitjain. Baroh kine ki jingialehkai kin long ha ka por 3:15 janmiet.