Sakhi da ki hajar ki paidbah ia ka lympung ialehkai MSL ha Wahiajer stadium; pynliem ka Shillong Lajong da 9-0 iaka 7 Wasa

Syllad | The Rising MeghalayaOctober 26, 2024

Da ki hajar ngut ki paidbah ki la wan ban sakhi ia ka jingialehkai hapdeng ka Shillong Lajong FC pyrshah ia ka 7 Wasa United ha Multi Sports Complex Stadium ha Wahiajer ha 26 tarik Risaw ha kaba ka Lajong ka la pynliem noh da 9-0 ha kane ka jingsdang jong ka lympung ialehkai 4th Meghalaya State League 2024.

Ha kane ka jingialehkai u Deibormame Tongper u la ioh hattrick hadien ba u la ioh ban pynkhih jar ha ka minit kaba (36′, 45’+2, 56′), kata nalor kiwei pat ki kol ba la thep da ki player jong ka kynhun kiba kynthup ia u Yohaan Benjamin (16’), Iohborlang L Lyngkhoi (18’P), Mebannangkiew Thabah (48’, 50’), Babysunday Marngar (90’+2) bad u Emanbha Marbaniang ha ka minit kaba (90’+4).

Ia kane ka lympung ialehkai la pynlong da ka Meghalaya Football Association bad la kyrshan pura da ka Department of Sports and Youth Affairs jong ka sorkar jylla.

Ha kane ka sngi plie ia kane ka lympung ialehkai la ia don lang u Symbud Myntri Rangbah ka Jylla u Bah Sniawbhalang Dhar kum u Kongsan uba la ai ka jingiaroh ia ka MFA kaba la lah ban wanrah ia kane ka sngi sdang jong ka jingialehkai ha kane ka stadium kaba thymmai ha Wahiaher na ka bynta ban kyntiew ia ka phutbol ha kylleng ka Jylla.

“Ka Jylla mynta ka la don buntylli ki madan ialehkai artificial turf, ki athletic track kiba katkum kane ka juk bad kiwei kiwei ki jaka ialehkai sport,” ong u Myntri. U la ong ruh ba kane ka thain barabor la tip bha kum ka karkhana phutbol, bad kane ka dei ban iai bteng namar ka phutbol mynta kam dei shuh tang kum ki jingialehkai myllen, hynrei ka la kylla long kum ka lad kamai kajih.

U President ka MFA u Bah Hamletson Dohling ha ka jingkren u la ai khublei ia ka Sorkar Jylla halor ka jingkyrshan kaba iai bteng jong ka namar khlem ka jingkyrshan jong ka yn ym lah ban pynlong ia kane ka lympung ialehkai.

“Ka MFA ka dang trei borbah ban kyntiew ia ka phutbol ha kylleng ka jylla na ka bynta ka jingmyntoi jong ki samla,” u la ong haba pynpaw halor kane ka lympung ialehkai Meghalaya Youth League kaba thymmai bad ka jingkynthup shuh shuh ia ki District Sports Association. U la ong ruh, “Ngi kwah ba ka Meghalaya kan pynmih ia ki player kiba tbit bad ban long ka jylla kaba paw ha ki kam ialehkai phutbol.”