Khihwin ka madan Polo ba pynliem ka Shillong Lajong ia ka Gokulam Kerala da 3-1 ha ka sien jop ba nyngkong ka I League

Syllad | The Rising MeghalayaNovember 19, 2023

Ka madan SSA Stadium, Polo, Shillong haka Sngi U Blei ka la khihwin da ka jingrisa jong ki paidbah hadien ba ka Shillong Lajong FC ka la lah ban pynrem noh ia ka Gokulam Kerala da 3-1, kata ha ka jingjop ha ka sien kaba nyngkong eh ha kane ka aiom ialehkai haka I League.

Kane ka jingiakhun ka la long kaba jwat bha naduh kaba sdang jong ka jingialehkai, ha kaba ka Lajong ka la iakhun ia kane ka jingialehkai ha ryngkat ka jingkyrshan pura jong ki paidbah nong peitkai. Hapdeng ka jingialehkai kaba itynnad bha ka Lajong ka la ioh ban pynkhih nyngkong ia ka jar ha ka minit kaba 30 lyngba u Daniel Gonçalves ia kaba la iarap pynbuh bol da u Kapten ka kynhun u Hardy Cliff Nongbri.

Ka Gokulam ka la iaksaid tyngeh bad ioh ia ka lad ban pyniakhaid ha ka minit kaba 43, lyngba u Nili Perdomo. Kumta ka jingialehkai ka la kut noh da ka jingiakhaid ha ka kylla step.

Haba bteng biang iaka jingialehkai haka kylla miet, ka Lajong ka la lah ban pynkylla ia katto katne ki buit ialehkasi jong ka ban iai ban bor pyrshah ia ki rangialehkai jong ka Gokulam. Tang hadien khyndiat minit ka Lajong ka la lah ban tam biang hadien ka penalty ba la shut da u Renan Paulino De Souza lyngba ka foul ba la ioh da u Phrangki Buam hapoh ka box.

Hynrei, wat hadien ka jingpyrshang borbah jong ka Gokulam, ka Lajong ka la lah ban banbor shuh shuh bad ioh lad ban pynkhih jar biang ha ka minit kaba 90+8  kaba dei ruh ka por ban sa pynwai syndon lyngba u kapten jong ka u Hardy Cliff Nongbri.

Lyngba kane ka jingjop ka Shillong Lajong mynta ka mad ia laitylli ki jingiakhaid bad kane ka jingjop na ki sawtylli ki jingialehkai kiba ka la dep ban iakhun. Mynta ka Lajong kala kamai hynriew point bad ka don haka kyrdan kaba hynriew katkum ka miej iakhein point.

Da kane ka jingjop ka Lajong mynta ka la pynkhreh bha na ka bynta kawei pat ka jingiakhun ka ban long pyrshah ia ka Delhi FC ka ban long ha ka 22 tarik mynta u bnai ha ka por 2 baje nohphai sngi hapoh SSA Stadium ha Polo Shillong.