Pynlong Aquafest ka tnat Fisheries ha Mairang

Syllad | The Rising MeghalayaDecember 15, 2022

U Deputy Commissioner ka Eastern West Khasi Hills District, u Bah W Nongsiej hynne ka sngi u la ioh ban plie ia ka Eastern West Khasi Hills District Aquafest ha phyllaw jong ka Tirot Sing Memorial Hall, Pyndengumiong, Mairang ha ka jingsynran lang ki ophisar jong ki tnat sorkar bapher bapher jong ka distrik, ki nongrep, ki dkhot Seng Treilang (SHG), ki nonghikai bad ki khynnah pule.

Haba kren ha ka jingialang plié ia kane ka Aquafest kaba long ka rynsan pyninam ia ki dohkha bad kiwei pat ki mar ba la pynmih da ki tnat sorkar bapher bapher bad ki Seng Treilang (SHG) kumjuh, u Deputy Commissioner ka Eastern West Khasi Hills District, u Bah W. Nongsiej u la ai khublei ia ka tnat Fisheries jong ka jylla ba ki la pynlong ia kane ka prokram bad u la ong shuhshuh ba kane ka prokram ka long kaba biang paka na ka bynta ki nongshongshnong ban iaphylliew jingmut bad ki nongtrei sorkar halor ki skhim bad prokram ki jongki bad ka ailad ruh ia ki nongrep bad ki Seng Treilang ka thain ba kin pyninam bad ruh ban die ia ki mar kiba maki ki pynmih. 

U Bah Nongsiej u la ong ruh ba ka jingthmu jong kane ka prokram ka long ban pynshlur  ia ki paidbah nongrep bad ki nongsengkam lajong kiba don hapoh  ka distrik bad u la kyntu ia ki paidbah kiba la wan sakhi ia kane ka prokram ba kin iashimbynta ha ki skhim bapher bapher ia kiba la pyntreikam lyngba ka tnat ri dohkha jong ka sorkar jylla.

Ha kane ka sngi, la sakhi ia ka jingpyninam bad jingdie ia ki mar bapher bapher ba la pynmih da ki tnat sorkar kum ka tnat Fisheries, Agriculture, Veterinary& Animal Husbandry, Commerce and Industries bad kiwei bad ruh ia ki mar ba la pynmih da ki nongrep bad ki Seng Treilang ka thain.

La ioh ruh ban sam ia ki synduk ri dohkha (Aquarium) bad ki dohkha  bunrong (ornamental fishes) na ka bynta ban buh ha kitei ki aquarium sha ki saw tylli ki kolej ka distrik, kata, ka  Tirot Sing Memorial College, ka Khatsawphra College, ka Mairang Presbyterian Science College bad ka Mawkyllei College.