Pynlong “Awareness cum Voluntary Blood Donation Camp” ka Kyrmen Foundation ha Madankynsaw

Syllad | The Rising MeghalayaAugust 12, 2024

Kum ka dak ban iashim bynta ha ka jingrakhe ia ka sngi laitluid jong ka ri (Independence Day) ka ban long ha ka 15 tarik mynta u bnai, ka Kyrmen Foundation ha ka 10 tarik mynta u bnai ka la pynlong da ka “Awareness Cum Voluntary Blood Donation Camp” ha ka shnong Madankynsaw- Mowkyndeng, West Jaintia Hills, ha kaba ki la don phra ngut kiba la wan shakhmat ban ai snam mon sngewbha.

Ha kane ka prokram la iadon lang ruh u Myntri ka sorkar Jylla u Bah Kyrmen Shylla kum u Kongsan uba ha ka jingkren u la ai ka jingiaroh ia ki nongshong shnong kiba la kloi ban pynlong ia kane ka prokram ban ai snam khamtam ruh ia kito kiba la wan shakhmat ban iashim bynta ha kaba ai snam mon sngewbha ban pynsah kynmaw ia kane ka sngi.

Ha kane ka sngi la ia don lang ruh u ADC u Bah Wankhraw K Kharbuli kum u Symbud Kongsan, Dr. I Khyriam Senior Medical and Health Officer, BDO ka Laskein Block Barister Niang, Rangbah Shnonong jong ki sawtylli ki shnong kiba kynthup ia ka Nongkynrih, Mowlieh, Mulum bad Raliang.

Baroh ki nongkren ki la ai ka jingiaroh bad pynshlur ban bteng ha kaba pynlong ia kiba kum kine ki kam ba bha na ka bynta ka imlang ka sahlang hi baroh kawei.

Ka Shnong Madankynsaw- Mowkyndeng hapoh ka jingialam jong u Rangbah Shnong u Bah Bud Rimanki Chympa ka dei ka shnong kaba nyngkong eh ka ban shim bynta lang da baroh ki nongshong shnong na ka bynta ban pynlong ia kaba kum kane ka jingialang pynshai paidbah bad ai snam mon sngewbha.