Pynlong jingduwai ka kynhun seng Hindu ha Mawjymbuin hadien ba la pynbeit ia ki kynrum kynram

Syllad | The Rising MeghalayaFebruary 28, 2025

Ka kynhun seng niam Hindu na Guwahati ka Kutumba Surakshya Parishad (KSP), kaba la pyrshah jur halor ka jingkhang ia ka jingleh niam hapoh ka krem Mawjymbuin ha Mawsynram ha kaba khatduh ka la ioh ban pyndep ia ka jingduwai lehniam (puja) ia u blei Shiva hapoh kane ka jaka ba kyntang ha ka jingrakhe leh niam Maha Shivratri ha ka 26 tarik Rymphang.

U President ka KSP u Satya Ranjan Bora ha ryngkat ka jingsynran lang jong ka kynhun na ka seng ki la leit jngoh ia katei ka krem bad pyndep ia ka jingduwai lehniam, kaba long ruh ka sienjam kaba kongsan ha kaba iadei bad ka jinglah ban pynbeit ia ka jingeh kaba la neh la kham slem.

Kane ka jingiakynad ka la sdang naduh ka 6 tarik u Nailar 2024 hadien ba ka Dorbar Shnong jong ka Mawjymbuin ka la khang pyrshah ia ka jingleh niam hapoh kane ka krem Mawjymbuin kaba don ia u maw uba iasyriem bad u maw ba kyntang ne Shivling jong ki riewngeit Hindu kaba la pynmih ia ka jingiakynad bad ka jingiatai kaba jur bha.

Da kaba kut jingmut ban pynbeit ia kane ka jingeh, ka KSP ka la bteng ban buddien ia kane ka kam. Hadien katto katne bnai jong ka jingiakren ia pynbeit, la lah ban weng ia kane ka jingeh hadien ka jingialang kaba la long ha ka 3 tarik u Kyllalyngkot 2025 hapoh ka ophis jong ka Deputy Commissioner ka East Khasi Hills ha ka jingiadon lang ki nongmihkhmat na ka KSP ki ophisar ka sorkar Meghalaya bad ki dkhot jong ka Dorbar Shnong jong ka thain ha kaba la poi sha ka jingiamynjur kaba la ailad halor ka hok ban pynlong ia ka jingduwai lehniam ha katei ka krem.

Ha ka jingbud ryntih ia ka jingiateh kular, ka kynhun ka KSP ka la pynlong ia ki jingduwai lehniam jong ki ia utei u Shivling khlem da pyndonkam ia ki tiar ki tar kum ki dhup, sharak, syntiew, ki soh bad kiwei pat bad pynleit jingmut beit tang ha kaba pynlong ia ki jingduwai.

Hadien ka jingpynlong ia kane ka jingduwai lehniam ba la ialam da u Satya Ranjan Bora , u Bora u la pynpaw ka jingsngew nguh kaba khraw ia ki bor pyniaid District ka EKH bad ia ki nongshong shnong katei ka thain halor ka jingiatreilang kaba ki la ai.

“Nga sngewkmen bad sngew burom shibun halor kane ka lad kaba ki nongshong shnong ki la pdiang sngewbha. Ka jingkloi ka jong ki ban pdiang bad ban iakynduh bad ngi ka la pynlong ia kane ka jingjia kaba phylla. Kum ki nongshong shnong jong ka ri kaba don ia ki jaidbynriew bapher bapher bad  kaba burom ia baroh ki jait niam, ka dei ka kamram ka jong ngi bad ka burom ka akor bad ka kamram katkum ki riti synshar ban burom iwei ia iwei pat bad pynioh ia ka jingiatylli ban pynskhem ia ka jinglong trai ri bad ka jingsuk jingsuk ha ka imlang ka sahlang,” u la ong.

U Bora u la ai ruh ia ka jingkhublei Maha Shivratri sha baroh ki nongiashim bynta bad sha ki paidbah ka jylla Meghalaya da kaba ban jur halor ka jingkongsan jong ka jingiaburom markylliang bad ka jingiatylli hapdeng ki jaidbynriew bapher bapher.