Pynlong jingiakhih ka AIM, shitaiew ai por ia ka Sorkar ban pynsangeh pynbor pynrung Aadhaar

Syllad | The Rising MeghalayaApril 9, 2025

Ka Awaken India Movement (AIM) ha ka 9 tarik Iaiong ka la ai por shitaiew ia ka Sorkar Jylla ba ka dei ban pynsangeh noh ban pynbor ia ki paidbah na ka bynta ban pynrung kyrteng Aadhaar.

Ia kane ka rai la shim hadien ka jingiakhih ba la pynlong hakhmat u dur mot jong u Kiang Nangbah ha Barik point hapdeng ka jingpyrkhing pahara.

Hapdeng kane ka jingiakhih ka la mih ruh ka jingiania bad pyni bor hapdeng ki bor pulit bad ki paidbah kiba iashim bynta ha kane ka jingiakhih hadien ka jingpyrshang ka jong ki ban leit tur sha Secretariat bad kaba la wanrah ruh ia ka jingdheng kali kaba jur ha Barik point.

Nalor kata la iohi ruh ia ki katto katne ngut ki nongiakhih kiba la shah patan ha ki pulit shapoh ka kali, hynrei ia kiba la pyllait noh hadien ka jingtuklar da u MLA ba la shah sospon ka VPP u Bah Adelbert Nongrum uba la pyniasoh lang ha kane ka jingiakhih jong ka AIM.

Hadien katto katne por la shah ia ki nongialam ka AIM ba kin iakynduh ia ka Deputy Commissioner ka East Khasi Hills District, ka Kong RM Kurbah na ka bynta ban aiti ia ka memorandum kaba iadei bad kane ka phang.

Hadien ka jingiakynduh, u president ka AIM u Bah Banshai Marbaniang u la pynpaw sha ki lad pathai khubor ba na ka liang ka DC ka la kular ia ka kynhun ba kan phah mardor ia kane ka memorandum sha u Myntri Rangbah ka Jylla u Conrad K Sangma na ka bynta ban ai ia ka rai bad ban leh ei ei halor kane ka phang.

U la pynshai ruh ba ka AIM kam long pyrshah ia ka jingpynrung Aadhaar, hynrei kane ka jingiakhih ka long pyrshah ia ka jingpyrshang jong ka Sorkar ban pynbor ia ki paidbah ba kin pynrung kyrteng Aadhaar ha ka Jylla.

Haba sot ia ka rai jong ka Iingkashari Supreme Court, u Bah Banshai u la ong, “Ka (hukum Kashari) ka la kdew shai ba ha ki Jylla khamtam ha Meghalaya, Assam bad Jammu & Kashmir ka jingpynrung kyrteng Aadhaar kam dei kaba kongsan. Namar kata ai ba ki briew kin shim ia ka rai la ki kwah ne kim kwah ban pynrung kyrteng Aadhaar. Kano kano ka jingpynbor kalong ka bym lah ban pdiang ha ka ri synshar paidbah.”

Watla katta une u nongialam ka AIM u la kynnoh ia ka sorkar halor ka jingbyrngem ban pynduh ia ki jingmyntoi jong u paidbah kynthup ia ki samla pule, ASHA, nongtrei Anganwadi, ki nongtrei job card lyngba ka MGNREGS bad ki nongbam pension lada kim don Aadhaar.

“Namar kane ka daw, ngi la shim ia ka rai ban ai por shitaiew ia ka Sorkar Jylla ba kan pynbeit ia kane ka kam bad lada kam lah ngim banse ban leit sha ka Iingkashari High Court Lane sha ka Supreme Court ban ioh ia ka jingbishar hok,” bynrap u nongialam ka AIM.