Pynlong jingiakhih ka BJP Meghalaya pyrshah ia ka kam bamsap ka Congress

Syllad | The Rising MeghalayaDecember 9, 2023

Ka jingshah kem u MP Rajya Sabha ka Seng Congress u Dhiraj Sahu ha ryngkat T.200 klur ka pisa napoh Jharkhand ka la pynlong ia ka Seng Bharatiya Janata Party (BJP) ha Meghalaya ba kan pynlong da ka jingiakhih haka sngi Saitjain ban kynthoh shuh shuh ia kam bamsap kiba dang iai bteng hapoh kane ka party kaba la rim tam.

Ia kane ka jingiakhih la khot pynlong da ki nongkitkam jong ka BJP Meghalaya hakhmat ka ophis treikam jong ka ha ka nongbah Shillong ban pynpaw pyrshah halor ki kam bamsap.

Na ka liang u nongaiktien ka party BJP ka jylla u Bah MH Kharkrang haba kren sha ki lad pathai khubor u la ong ba ka pisa ba la ioh kurup na utei u nongialam ka Seng Congress ka dei ka pisa paidbah bad ia kaba dei ban pynphai pat sha u paidbah. U la ong ruh ba kane ka party ka la don bynta ha kiba bun ki kam bamsap mynta la bun phew tylli ki snem ha ka kyrteng jong ka jingngeit niam ba laitluid.

Nalor kata u la ong ruh ba hapoh ka BJP ym don jingmap satia ha kaba iadei bad kino kino ki kam bamsap.

Shuh shuh ha kane ka sngi la ia don lang ruh u President BJP ka jylla u Rikman G Momin nalor kiwei pat.