Pynlong jingiakhih ki paidbah ka Narpuh Elaka ba jot rathai ka surok NH-06

Syllad | The Rising MeghalayaAugust 8, 2023

Ki nongshong shnong ka Narpuh Elaka, East Jaintia Hills district mynta ka sngi ki la pynlong da ka jingiakhih ban pynpaw pyrshah ia ka jingphiel jong ka National Highway Authority of India (NHAI) bad ka sorkar jylla ban pynsngap ia ka jingdawa ban maramot ia ka surok National Highway-06 kaba la jot rathai.

Ki paidbah hapoh ka jingialam jong ka Khasi Students’ Union (KSU) Narpuh Circle bad ki Rangbah Shnong jong ka thain Narpuh Elaka ki la ia mih paidbah ha ryngkat ki plakad bad ki jingthoh kiba pynrem jur ia kane ka jingleh bym suidniew jong katei ka tnat bad ka sorkar jylla.

Ia kane ka rally la pynlong hapoh Lumshnong Tollgate, ha kaba ki paidbah kiba don hapdeng ka jingbitar ki la khang ruh ia ka surok kum ka dak jingpynpaw pyrshah.

Ka surok NH-06 ka dei kawei na ki lynti surok ba kongsan kaba pyniasoh ia ka Meghalaya bad kiwei pat ki jylla jong ka thain shatei lammihngi kaba kynthup ia ka jylla Mizoram, Tripura, Barak Valley ka Assam bad ki bynta ba shatei jong ka Manipur.