Pynlong jingiakhih ki samla pule NEHU dawa pyntreikam iaka relative grading system

Syllad | The Rising MeghalayaSeptember 6, 2023

Ki samla pule ka skulbah North Eastern Hill University (NEHU) hapoh ka jingialam jong ka North Eastern Hill University Students’ Union (NEHUSU) mynta ka sngi ki la pynlong da ka jingiakhih hapoh ka phyllaw kane ka skul bah halor ka jingkynnoh leh shilliang halor ka rukom ai marks da kane ka university kaba la wanrah ka jingduhnong kaba khraw ia ki samla pule.

Na ka liang ka Union ka la dawa ruh na ka University ba ka dei ban pynsangeh noh mardor ia ka result jong ka 2nd semester tad haduh ban da pyntreikam ia ka relative grading system.

Ha ka memorandum sha u Vice Chancellor ka NEHU u Prof P Shukla, ka NEHUSU ka la pynpaw ka jingsngewkhia halor kane ka bynta bad dawa ban pynkylla ia kane ka grading system kaba mynta namar la shem ba kane ka grading system ba la pyntreikam da kane ka jaka pule ka dei kaba rit tam haba ianujor bad kiwei ki University ki ba don ha kylleng ka ri.

Ka NEHUSU ka la ong ruh ba katkum ka UGC guideline, ka jingpyntreikam ia kiwei pat ki grading system hapoh ki university ha baroh kawei ka ri ki dei kiba la ioh ia ka jingithuh na ka AICTE bad kaba long ka jingmyntoi kaba khraw na ka bynta ki samla pule.

Kane ka jingiakhih da kaba iaid paidbah kala sdang napoh Central Library bad pynkut hapoh Administrative Block, kata shabar ka ophis treikam u Vice Chancellor ka NEHU.

Shuh shuh samla pule kila dawa ruh ia une u VC ba u dei ban shongthait noh da kaba kynnoh ruh ba um shym la pynsngap satia ha kaba iadei bad ka jingdawa jong ki samla pule.