Pynlong jingialang bishar kam u Dy.CM ha kaba iadei bad ki jingjia pluh iing ha ka jylla

Syllad | The Rising MeghalayaOctober 27, 2023

U Symbud Myntri Rangbah ka Jylla uba khmih ia ka Tnat Home (Police) u Bah Prestone Tynsong haka sngi Palei u la khot pynlong ia ka jingialang bishar kam ha kaba iadei bad ki jingjia pluh iing kiba jia hapoh ka Jylla.

Haba kren sha ki lad pathai khubor, u Bah Prestone ula ong “Ngi la shim ia ki katto katne ki rai ha kaba nga la bthah ruh ia ka tnat ba dei khmih, ia u Inspector General (IG) ba kin aiti ia baroh ki jingtip ba bniah, kiei ki jingeh ba ki iakynduh, kata la ka long ha kaba iadei bad ki tiar ki tar lane ka jingdonkam briew. Nga la bthah ia u (IG) ban aiti sha ka Sorkar bad ngin sa peit kawei hadien kawei ia baroh kine ki jingdonkam kham kloi kat kaba lah” u la ong.

Ka jingpynlong ia kane ka jingialang ka la wan long ruh khyndiat taiew hadien ba la sakhi ia ka jingjia jingpluh ha ka thain Khyndailad, Police Bazaar.

Ha kaba iadei bad kafire safety audit na ka bynta ki Iing ki sem bad kiwei kiwei pat ki jingtei, u Symbud Myntri Rangbah ula ong “Kane ruh ka dei shibynta jong ka jingiakren ha ka jingialang. Na kata ka daw nga pynpaw sha phi ba nga la dep bthah ia ka Fire Service wing ba kin aiti ia baroh ki jingtip kaba mut ki jingai jingmut sha ka Sorkar bad hadien ba ngi ioh pdiang ia kane, ngan sa khot biang ia ka jingialang”.

Shuh shuh haba jubab ia ka jingkylli u Bah Prestone u la ong ruh; “Ngan sa khot biang ia ka jingialang ha kaba iadei bad kane ka phang bad nginsa iakren ha ki kyrdan ba halor halor ka jingdonkam ban wanrah ia ka fire safety policy bad ki SOP khamtam ha ki jaka sor namar ka long kaba donkam kyrkieh.”