Pynlong jingialang u Myntri bad ki ophisar ban bishar bniah halor ki jingshah pynjulor na ka Cyclone Remal
U Myntri ka sorkar Jylla uba khmih ia ka Tnat Revenue bad Disaster Management u Bah Kyrmen Shylla ha ka 31 tarik Jymmang u la khot pynlong ia ka jingialang bad ki ophisar na ka bynta ban bishar bniah halor ki jingjia shah pynjulor ha ki bor mariang khamtam hadien ka jingwan syllad ba dang shen jong ka Cyclone Remal.
Ha kane ka jingialang la wan iashim bynta da u Commissioner & Secretary u Sanjay Goyal, ka Secretary Revenue bad Disaster Management ka Kong Matsiewdor War Nongbri nalor kiwei pat ki heh sorkar na ka Tnat SDMA.
![](https://www.syllad.com/wp-content/uploads/2024/09/JIT-Vacancy-823x1024.avif)
Ka jingiakren ba kongsan kalong halor ki jingshah pynjulor ha u Cyclone, kata kaba kynthup ia ki jingtwa khyndew, bad ka jingther u ‘lapbah kaba la ktah jur ia baroh ki district jong ka jylla Meghalaya.
Nalor kata ki mat ba la iatai bha ha kane ka jingialang ki kynthup ia ki jingduh na ki jingshah pynjulor na ki jingtwa khyndew, ka jingtwa ki iing ki sem, ki lynti surok bad ka jingshah pynthut ha ka leit ka wan, ki jingshlei um, ki jingtei kiba la ktah jur ia ki paidbah ka Jylla bad halor ki lad aijingiarap ba kyrkieh ia kiba la pynioh na ka bynta ki lanot.
Nalor kata la iatai ruh halor ki sienjam ba la shim da ki kynhun aijingiarap bapher bapher kaba kynthup ia ka SDMA, SDRF, Deputy Commissioner bad ki laitylli ki tnat treikam jong ka MeECL. Kine ki kynhun ki la trei borbah halor ki kam aijingiarap kiba kyrkieh sha kito kiba la shah ktah khamtam na ka bynta ban pynbiang ia ki jingdonkam sha kito ki jaka kiba la shah ktah jur.
Na ka liang u Myntri u la pynpaw ruh halor ki jingpynkhreh kiba la shim da ka State Emergency Operations Center, Districts, kiba la pyndonkam ia ka Common Alerting Protocol (CAP) na ka bynta ban pyllait mardor ia ki jingpynbna bad ki jingmaham, ka Emergency Response Support System (ERSS) kiba dei ki jingmaham lyngba ka App jong ka sorkar India.
U Myntri u la ban jur ruh halor ka jingdonkam ban bteng ia ka jingpeitngor bad ban long kiba la pynkhreh halor ki sienjam khnang ban pynduna na ka jingshah pynjulor ha ki bor ka mariang ha sngi ki por ki ban dang wan.
Shuh shuh u Myntri u la pynpaw ruh ka jingsngewkhia ha kaba iadei bad ka kam aijingiarap bad ban wad ia ki lanot ha ka shnong Nongpriang bad halor ki kam maramot ha kylleng ki district.
Leave a Reply