Pynlong jingpynshai paidbah bad jurip jingpang bampong ha Civil Hospital Ialong

Syllad | The Rising MeghalayaDecember 15, 2023

Ka NCD Cell, West Jaintia Hills District haka 14 tarik Nohprah ka la pynlong ia ka prokram pynshai paidbah  halor ka jingpang bampong (cancer) bad ka jingjurip ne screening hapoh Jowai Civil Hospital, Ialong ha kaba la ioh ruh ia ka jingkren na u Dr. K Dhar, Additional DMHO, West Jaintia Hills ula long kum u kongsan.

La ong ba katkum ka jingioh jingkhein halor ka jingdon jong kiba pang bampong bad ki jingshitom kiba don jingiadei hapoh ka thain Shatei Lammihngi (North East) ha u snem 2021, ka Meghalaya ka don ha ka kyrdan kaba 6 ha kaba iadei bad ki shynrang bad 19 ki kynthei kiba ioh ia kane ka jingpang hapoh ka ri, kata da haduh 178.8 tylli ki case na ki 1 lak ki nongshong shnong bad kumjuh da 96.5 ki case.

Katkum ka Statistic la shem ba ki jingdon jong ki briew kiba ioh ia ki jingpang bampong ka la kiew sted bha. Kumta khnang ban kyntiew ia ka jinglong jingman ha ka koit ka khiah ha ka jylla, na ka liang ka sorkar jylla ka la shimkhia ban aijingkyrshan ia ka State Cancer Society of Meghalaya khnang ban pynduna ia ka jingdon jong ki briew kiba shah ktah ha kane ka jingshitom da kaba pynlong ia ki jingpynshai paidbah, ki lad jingiada bad ki lad ban lapdien kham kloi ia kane ka jingpang.

Kumta na ka liang ka Society ka thmu ban kyntiew ia ka koit ka khiah hapdeng ki nongshong shnong da kaba pynpaw ia ki jingpynshai paidbah bad ka jingleh ia ki test ha kaba iadei bad kane ka  jingshitom.

Ha kane ka jingialang ba la pyniaid da ka Dr.M.Syngkon, District Nodal Officer, CPHC,WJH la ioh ruh ia ka jingkren pdiang sngewbha na ka Medical Superintendent, JCH, I Dr. AM Pasweth bad ka jingkren ai khublei na ka Dr.S. Suja, DNO, NP-NCD,WJH.

Ha kane ka jingpynshai paidbah la iadonlang ka Dr. Anisha Mawlong, Specialist HOD Radiation Oncology Department Civil Hospital Shillong.

Ha kane ka prokram kumba 40 ngut ki nongshong shnong kila myntoi na kane ka jingjurip jingpang bampong.