Pynlong ka Akashvani Shillong ia ka seminar ban rakhe ia ka jingiaid lynti ka India ha ka G-20 Presidency

Syllad | The Rising MeghalayaAugust 22, 2023

Ka Akashvani Shillong mynta ka sngi shibynta jong  ka prokram ban rakhe ia ka G20 Presidency jong ka India,  ka la pynlong da ka Seminar ha NEHU, Shillong ha ka jingiadon lang u Commissioner Secretary sha u Lat ka jylla Meghalaya, u Dr B D R Tiwari uba la plie ia kane ka prokram da kaba kyntu ia ki samla pule bad ki nongiashim bynta ba kin pdiang ia ka jingngeit ha ‘Kawei ka Pyrthei, Kawei ka Longiing, Kawei ka Lawei’ kaba long ka phang jong ka G20 hapoh ka Presidency jong ka India.

U Dr Tiwariu la batai shaphang ka ‘Sarvajana Hitaya Sarvajana Sukhaya’, kaba mut ka bha ka miat bad ka jingkmen jong baroh, ka pyrthei ha kaba ka imlang sahlang bad ka bha ka miat jong baroh ka kham kongsan ia ki jingmyntoi shimet.

U la ong ba ka G-20 presidency jong ka India ka dei ka lad kaba kyrpang na ka bynta ka ri, namar ka India ka don ki jinghikai kiba bun ban iasam bad ka pyrthei ha kaba iadei bad ka jingim kaba jan bad ka mariang. U la ong ba kane ka seminar ka dei ban khring ia ki samla ha kane ka G20 Presidency jong ka India bad ai jingtip ia ki shaphang ki jingiakren halor ki phang bapher bapher. Ka India ka dei kaba la pawnam namar ka jingnang jingstad bad ka jingshemphang bad ka G-20 presidency jong ka India kan iarap ban pynsaphriang ia ka khubor jong ka India sha ka pyrthei.

Ha ka bynta technical, u Bah AiborlangWanswett, Senior Director (IT) & Scientist F, National Informatics Centre, Meghalaya, Shillong u la ai ka jingthoh ‘Digital technologies for sustainable development.

U Bah Vivek Lyngdoh, Jr. Research Fellow, Meghalaya Climate Change, Shillong u la ai ka jingthoh ‘Go green – be kind to nature for a better future’ bad ia ka jingthoh’ Sustainable Agriculture & Food Security’ la ai da ka Dr.Bingiala Laloo, Asstt. Prof., School of Crop Improvement, College of Post graduate Studies in Agricultural Sciences, Umiam, Ri Bhoi katba uVivek Kumar, Research Scholar, ka tnat Environmental Science, NEHU u la ai ka jingthoh ‘Your Planet needs you – unite to combat climate change’.

Ha kane ka Seminar ba la pyniaid da u Rahul Chatterjee ki samla pule na ki tnat bapher bapher jong ka NEHU ki la iashim bynta ha kane ka Seminar. 

Ka open quiz kaba iadei bad ka G20 Presidency jong ka India ka dei kaba shongshit bha bad ki nongiashim bynta ki la pyni ia la ki jingtip shaphang kane ka phang. Kiwei kiwei ki prokram ki kynthup ki jingrwai tynrai da ki kynhun ba ialam da ka Kong Larihun Mawlongbad u Bah E W Kharsahnoh kiba la khring bha ia ki nongiashim bynta ha kane ka seminar.

Ia ka jingkren pdiang sngewbha la ai da u Head of Office, Akashvani, Shillong u H. Diengdoh&ia ka jingkren ai jingsngewnguh la ai da ka Kong R. M. L. Marbaniang, Head of Programme, Akashvani, Shillong.

Ka India kan pynlong ia ka G20 summit ha New Delhi ha ka 9 bad 10 tarik u Nailur. Hashuwa kane, ka Akashvanika la pynlong ia ki prokram bapher bapher kum ka nongpynmih prokram ba heh tam ha ka pyrthei.