Pynlong ka BJP da ka jingiakop NAMO Kabaddi kaba nyngkong ha ka jylla

Syllad | The Rising MeghalayaDecember 23, 2023

Ka Bharatiya Janata Party (BJP Meghalaya Kisan Morcha ha ryngkat ka jingiatreilang bad ka BJP National Kisan Morcha ka la pynlong ia ka NAMO Kabaddi Tournament kaba nyngkong eh ha ka jylla kaba long ruh katkum ka jingbthah da ka PMO.

Ia kane ka jingialehkai la pynlong ha ki ar jaka, kata ha Sohra Sub-Division, EKH ha ka 20 tarik mynta u bnai ha ka por mynstep bad kaba ar ha Ri Bhoi District ha ka por janmiet.

Ha ka jingialehkai kaba la long ha Sohra la ia don lang ruh u Shyam Shundor In-charge BSF Bholaganj Post kum u Kongsan uba ha ka jingkren u la pynshlur bad ai mynsiem ia ki nongiashim bynta.

Katba na ka liang u Symbud Kongsan u Bah Ekhel Marwein, Principal Ramakrishna Mission Bholaganj u la pynpaw ia ka jingkmen halor ka jinglah ban pynlong ia kane ka tournament bad aimynsiem ruh ia ki nongiashim bynta ha kane ka jingialehkai nangne shakhmat.

U la pynkynmaw ruh ruh ha kane ka jingialang ba kum kane ka jingialehkai ka dei ka sien kaba nyngkong eh ba la pynlong ha kane ka jylla bad ai khublei ia ka managing committee halor ka sienjam kaba ki la shim.

Na ka liang u President ka BJP Meghalaya KisanMorcha, u Bah Ralden Bryan Shabong u la ong, “Ka thong ka jong ngi ka long ban wad ia ki sap ki phong na ki thain ba kyndong bad ban kyntiew ia ki khnang ba kin lah ban kylla long ki nongialehkai ba pawkhmat ha ka jylla bad ka ri hi baroh kawei.”

Kumjuh ha ka tournament kaba la long ha Ri Bhoi la ia don lang ruh General Secretary kane ka district u Bah EvaristMyrching, u President ka BJYM President u Bah  Mewaker Lyngdoh, BJYM General Secretary u Joydeep Ghosh, District President ka BJP Ri Bhoi u Bah Sen Thabah bad u President ka Ri Bhoi District Kissan Morcha u Bah Munim Raja nalor ki president na kiwei pat ki Mandal napoh ka district lem bad ki dkhot jong ka Mahila Morcha.