Pynlong ka BSF da ka prokram ai jingsumar ei bad ka jingpyni tiar siat ha EKH

Syllad | The Rising MeghalayaSeptember 27, 2023

Ka tnat shipai BSF Meghalaya na ka 110th Battalion haka sngi Saitjain kaba la lah, ka la pynlong da ka prokram aijingsumar ei shibynta ka jingtreikam kaba thmu na ka bynta ka bha ka miat jong ki nongshong shnong kiba shong ba sah ha ki thain khappud ka India bad Bangladesh hapoh Border Outpost Bholaganj ha East Khasi Hills District.

Ia kane ka prokram la wan plie da u heh shipai ki BSF u Pradip Kumar, IPS, IG BSF Meghalaya ha ryngkat ka jingiadon lang u Commandant ka 110 Bn nalor ki paidbah nongshong shnong jong ka thain.

Ha kane ka prokram na ka liang ki doktor na kane ka tnat shipai bad ki riew paidbah kila pynlong ka jingeksamin bad sam ei ia ki dawai dashin sha ki nongshong shnong kiba kham duna ha ka liang ka ioh ka kot kiba dei napoh ka shnong Bholaganj, Nayabasti, Chaklabasti bad  Kurikhal.

Nalor kane ka prokram aijingsumar, ki shipai BSF ki la pynlong ruh ia ka ‘Weapon Exhibition’ ne ka jingpyni paidbah ia ki tiar siat na ka bynta ki khynnah skul jong ka Ramakrishna Mission ha Bholaganj ha kaba la sakhi ia ka jingangnud jong ki khynnah skul ban tip shaphang kine ki tiar ialeh bad ia kaba la pynshai ruh da ki dkhot jong kane ka tnat shipai.

Na ka liang ki nongialam shnong kumjuh ki riew paidbah jong kine ki shnong ki la pynpaw ka jingkhublei ia kane ka sienjam ba la shim da kane ka tnat shipai kaba long da shisha ka jingmyntoi kaba khraw ia ki paidbah nongshong shnong jong kine ki thain khappud.