Pynlong ka DSWO da ka jingiaid rally ki cycle ban ialap ia ka jingshyrkhei jong u drok ha Jowai

Syllad | The Rising MeghalayaJune 23, 2024

Shibynta ban ialap bad pynshai paidbah halor ka jingshyrkhei jong u drok bad ki jingkhaii beain, na ka liang ka District Social Welfare Office (DSWO), ha ryngkat ka jingiatreilang bad ka District Sports Office (DSO) nalor ka West Jaintia Adventure and Cycling Association ha ka 22 tarik Jylliew ki la pynlong da ka jingiaid rally da ki cycle.

Ia kane ka sienjam la shim shibynta ka jingrakhe ia ka “International Day Against Drug Abuse and Illicit Trafficking,” kata ka sngi ban pynkhlain ia ki sienjam bad ka jingiatreilang ban pynlong ia ka jylla ne ka ri kaba lait na u drok.

La sdang ia kane ka prokram da kaba pynlong ia ki jingpynshai paidbah hapdeng ki nongwan iashim bynta bad ki nongshong shnong halor ka jingshyrkhei bad ka jingpynjot na ka jingkyrni ha ki jingdih drok bad halor ka jingdonkam ban ioh ia ka jinglong jingim kaba lait na u drok.

Kiba la ia don lang bad ai jingkren ha kane ka prokram ki kynthup ia u District Social Welfare Officer, District Sports Officer bad ki President ka ka West Jaintia Adventure and Cycling Association.

Hadien la pynbud da ka jingiaid rally rally da ki cycle ha ki surok bah ba kongsan bad baroh ki dong jong ka sor Jowai ha ryngkat ki jingthoh kiba ialap na ka bynta ka imlang ka sahlang kaba lait na u drok.

Katba kane ka rally ka dang iaid shakhmat, ki volunteer bad ki nongiashim bynta ki la sam ruh ia ki kot lyngkdop kiba maham halor ka jingshyrkhei jong u drok sha ki paidbah. Kine ki kot lynkdop ki aijingtip ruh halor ki lad jingiarap na ka bynta kito kiba la kyrni ha u drok kumjuh ia ki phone nombor jong ki kynhun trai shnong kiba aijingkyrshan.

Ka jingpynlong ia kane ka rally ka pynpaw ruh halor ka jingdonkam ia ka jingiatreilang bad ban shimkhia ia kane ka mat kaba khia shibun. La pynkut ia kane ka sngi ha ryngkat ka khubor kaba shai, kata “Lyngba ka jingiatylli, ka pule puthi bad ka jingiashim bynta shitrhem yn lah ban pynlong ia ka imlang ka sahlang kaba lait na u drok.”