Pynlong ka Jaintia Eastern College da ka Red Ribbon Club Youth Festival ban iakhun pyrshah iaka jingpang HIV/AIDS

Syllad | The Rising MeghalayaJuly 28, 2023

Ka Jaintia Eastern College, Khliehriat bad ka Meghalaya AIDS Control Society, Shillong ryngkat ka jingiatreilang bad ka Kyrmen Foundation, ka Jaintia Hills Cement Manufactures Association (JHCMA) ki la pynlong ia ka “Red Ribbon Club Youth Festival 2023” halor ka phang “Be inspired, Own your Future”.

Ha kane ka Festival la wan iashim bynta da ki samla pule bad khynnah skul na ki hynniew tylli ki kolej bad hynniew tylli ki skul na East Jaintia Hills bad West Jaintia Hills District.

Ia kane ka Festival la pynlong ha ki ar sngi kynthih kata ha ka 28 bad 29 tarik mynta u bnai hapoh Jaintia Eastern College, Khliehriat ha kaba la wan ban plie da u Deputy Commissioner ka East Jaintia Hills u Abhilash Baranwal, IAS kum u Kongsan.

Ha ka jingkren u DC Abhilash Baranwal, ula ong ba kane ka dei kaba por ba ki samla kin long phikir ban ioh met kaba koit kaba khiah. Ula ong ruh ba kum ki samla ka dei ruh ka por ba kin jied kaei kaba bha bad kaba sniew bad haba ki samla ki lah ban bishar hapdeng kine ar kin lah ban jop bad ban iaid ha ka lynti kaba dei haka jingim kum ki samla. Ula ong ruh ba kaba kongsan ka dei ka jingrai kut kaba skhem ban shimkhia ban iakhun pyrshah ia ka jingpang HIV ba kan lait na ka jingsaphriang.

Ha kane ka jingialang ba la pyniaid da u Principal ka Jaintia Eastern College, Khliehriat u Dr. Phervision Nongtdu la ioh ruh ka jingbatai bniah halor kane ka  phang da ka Assistant Proff. PS. Phawa bad ha kaba kut jong ka jingialang la ioh ka jingkren ai khublei na ka Asistant Proff ka Kong FD Lytan.

Ha kine ki ar sngi la pynlong ia ki jingiakop bapher bapher kynthup ka Abhivyakti (Red Show), RCC Quiz Competition, Marathon (Red Run) bad Flash Mob.

Ha ka sngi sdang la pynlong ia ka jingpynshai paidbah halor kumno ban ïada bad ban pynduna ïa ka jingsaphriang bad ka jingpur stet jong u khñiang jingpang HIV/AIDS lyngba ka riew shemphang ka Kong Rinibeth Patlong Program Manager MCSWA TI CC Khliehriat ha Ladrymbai.