Pynlong ka Kiang Nangbah Govt College iaka jingialang ban pynjem iaka jingeh ki nonghikai ban pyntreikam iaka ITEP

Syllad | The Rising MeghalayaOctober 19, 2023

Ka Kiang Nangbah Government College, Jowai ha ka 18 tarik Risaw ka la pynlong da ka “Handholding Session for Teaching Faculties” ne ka jingialang ban kyrshan ban ai mynsiem bad ban pynjem iaka jingeh ki nonghikai ha kaba iadei bad ka jingpyntreikam ia ka Integrated Teacher Education Programme (ITEP) kaba don ka jingpyniasoh ne iaid ryngkat ryngkat bad ka NEP 2020, ha ryngkat ka jingiatreilang bad ka National Council for Teacher Education (NCTE), New Delhi.

Ka  Principal ka Kiang Nangbah Government College ka Dr. (Mrs) EM Blah kaba la ai ka jingkren plie ka la pynpaw ba ka ITEP ka dei ka education programme kaba thymmai na ka bynta ki nonghikai ba la wanrah da ka NCTE kaba pyniasoh bad iaid ryngkat ryngkat bad ka National Education Policy 2020 kaba plie lad halor kiba bun ki lad jingpule ha ki jaka pule kiba kham shalor da ka jingthmu ban pyntbit ia ki samla pule – nonghikai bad pynthikna ba kito kiba dei hok kin ioh ban rung ha ka kam hikai.Ka la ai mynsiem ruh ia ki samla pule bad pynthikna ba kin ioh ia baroh ki jingdonkam ki ban iarap ia ki ba kin poi sha ka thong.

U Prof. RC Patel u riew shemphang ka ri uba dei ruh u dkhot jong ka ITEP Curriculum Core Committee Member bad expert ha ka Handholding Session ha prokram kaba nyngkong ula khring shibun ia ki nongiashim bynta lyngba ka jingbatai ia ka lynti jong ki jingpule jong ki nonghikai naduh kaba sdang, bad kumno ka ITEP ka la mih namar ka jingdonkam ban pynkylla ia ki rukom treikam ha ka pule puthi jong ki nonghikai ne teacher education.

U la kdew halor ki bynta bapher bapher jong ka Education Commission bad aijingmut ruh ba barim ki nonghikai ki dei ban pule ia ka National Education Policy 2020 bad ban pynpaw halor ki jingai jingmut ba hakhmat eh jong ka Policy. Nalor kata u la pynshai ruh ha kaba iadei bad k ITEP lem bad kiwei pat ki  Teacher Education Programme ia kiba yn wanrah kham hadien, kata noh kine ki Teacher Education Programme ba bun jait kiba la dep don lypa.

Ha kane ka prokram ba la pyniaid da u Dr. Teibor Papang, Assistant Professor jong ka College la ia don lang ruh ka Prof. C Nongbri na ka Tnat Education Department, North-Eastern Hill University, Shillong kaba la iashim bynta ha ka jingai jingpynshai ha ka Second Handholding Session.   

Ha ka session kaba ar kaba dei ka ki jingbuh jingkylli, la buh jingkylli halor ki sawtylli ki bynta ne section, kata halor ka Academic, Regulations, Admissions bad kiwei pat ha kaba ka la don ka jingiathir bniah bad ioh ruh ka jingpynshai lyngba u Prof. RC Patel bad Prof. C. Nongbri.

La pynshongkun ia kane ka prokram da ka jingiadon ryngkat lang ka Principal, ki heh jong ki department bapher bapher ka college, ki nonghikai, ki staff bad ki samla pule ITEP.