Pynlong ka KKC Seinraij bad ka Lei Synshar iaka 2nd U Kiang Nangbah Youth Conference Jowai, pynshlur iaki samla ban ieng haka nongrim

Syllad | The Rising MeghalayaDecember 29, 2024

Ban pynrung haka pyrkhat pyrdain ki khun samla shaphang ka nongrim ieid ri bad ieid jaitbynriew, ka Khynroo Khyllood Committee, Seiñraij Jowai ryngkat ka Lei Synshar Cultural Society, Jaintia Hills kila shimkhia ban pynlong iaka 2nd Kiang Nangbah Youth Conference ha Jowai.

Kane kadei kawei na ki prokram bala mang kyrpang kum ka dak ka jingkynmaw burom iaka lynkhuh snem iap ba 162 u Kiang Nangbah bad la pynlong iaka haki arsngi ha kaba haka 29 tarik kala don ka Youth Conference ha Iungwaqlieh Dulong katba haka 30 tarik Nohprah kan don ka jingiaid surok ki samla bad ka jingialang kyrpang ha madan Mynkoipyrdi Iongpiah.

Iaka jingialang la pyniaid da u Sajonksiar Langdoh, Chairman KKC, Seiñraij haka jingdonlang ka kongsan ka Kong Pynbeit Passah, District Informatics Officer, West Jaiñtia Hills bad la ioh ka jingnguhblei nguhsyiem na u Heipormi Challam, Mylliangot Raij Jowai kumjuh ki jingkren aimynsiem iaki khun samla na u Hercules Toi, President Seiñraij Jowai, Kong Meena Laloo, President Lei Synchar Cultural Society, Jaiñtia Hills bad ka jingkren khublei na u Kamnipaia Challam, Secretary LSCS Jaintia Hills.

U Hercules Toi Haba haka jingkren ula ai mynsiem iaki khun samla halor ka jinglong jong u Kiang Nangbah kum u riew paidbah uba skhem ka nongrim bad ieid iaka ri bad ka jaitbynriew kat haduh ba ula ioh iaka kyrdan Khlawait ka ri.

Ka Kong Meena Laloo kala iathuh iaka jingiaid lynti ka Lei Synchar Cultural Society, Jaintia Hills ban ialam bad btin lynti iaki samla kat haduh ba la poi ka por ban iatreilang bad ka KCC Seinraij kaba don kajuh ka thong kajuh ka jingmut ban khring iaka pyrkhat pyrdain ki samla haka nongrim jong ka jingshlur, jingieid bad jingiatylli.

Ka Pynbeit Passah kum ka kongsan kala ai mynsiem iaki samla da kaba ong, u Kiang Nangbah u ieng ialeh pyrshah bad ki bor ka sorkar phareng da ka lynti ka hok, ka jingshlur, jingtylli bad jingieid bad u long ruh u briew uba iohi jngai, kumta kum ka pateng kane ka juk mynta, kala kyntu ban bud iaka nuksa babha jong u Kiang Nangbah khnang ba ka lawei jong ka ri bad ka jaitbynriew kan lait na ka jingshah ibein ne synshar donbor haki nongwei.

Kaba kham kyrpang ha kane ka 2nd Kiang Nangbah Youth Conference kadei ka jingkren ki samla kynthup ka Nilamroy Passah kaba la kren halor ka phang “Ki kam wa chemphang wa tule yei suk ka pateiñ” bad u Dawmanchuh Lamar ula kren halor ka phang “Kiang Nangbah kam u khon dapchynrang”.