Pynlong ka KSU Kupli Area Circle da ka jingthang mombati halor ka jingshah siat iap ki 5 ngut ha Mukroh

Syllad | The Rising MeghalayaDecember 1, 2022

Ka Khasi Students’ Union (KSU) Kupli Circle kala pynlong iaka jingthang mombati halor ka jingshah siat iap ki 5 ngut nongshong shnong ka Mukroh ha ki pulit Assam kaba la jia haka 22 tarik u Naiwieng  2022.

Ia kane ka jingthang mombati ban pynpaw iaka jingsngewlem halor ka jingduh ia kine ki 5 tylli ki mynisem la pynlong ha madan ialehkai football ka Iooksi Kyanmynsar haka sngi Balang. La wan ban shimbynta na ki nongialam shnong bad u paidbah na Iooksi Kyanmynsar Thlongmoo. La iadonlang ki nongialam bad dkhot ka FKJGP bad JSM nalor kiwei kiwei.

U Leiki Richard Tyngkan general secretary KSU Kupli Area Circle ula ong ba kane ka jingjia kala jia na kadaw ka jingleh kmienah ka sorkar iaki nongshong shnong ha khappud Assam Meghalaya.

“Ka sorkar kam lah ban ai jingiada ia u paidbah ha ki shnong khappud, katba ia u CM bad ki Minister la buh haduh 9-10 ngut ki pulit ban iada iaki, hynrei ha iaki paradoh parasnam kiba shong sah ha khappud ki m iaka jingim hapdeng ka jingsyier bad rit mynsiem,” la ong u Tyngkan bad bynrap ba ka sorkar ka bunkam ban thwet iaki nongialam sengbhalang haba ki pynlong iaki jingiakhih na ka bynta ka iap ka im u paidbah bad kam shimkhia ban phai khmat ban peit iaka jingeh u paidbah ha ki shnong khappud.

Kiwei kiwei kiba kren ki dei u Balawantei Suchiang president ka KSU Kupli Area Circle, u JC Wanniang u Waheh shnong Iooksi Kyanmynsar Thlongmoo Leonard Rabon, Ribok Biam president JSM Western region, Embhah Passah president ka FKJGP Iooksi circle.