Pynlong ka Loompyrdi Iongpiah da ka prokram iakynduhlang, pynkup burom bad pyllait iaki ticket lucky draw

Syllad | The Rising MeghalayaOctober 28, 2023

Ka Dorbar Shnong Loompyrdi Iongpiah hadien lai snem kala pynlong iaka prorkam iakynduhlang ‘Ka Iachemlang Wa Kyrpang’ haka 22 tarik Risaw. Ha kane ka sngi la pynkup burom iaki samla kiba pass bha bad kumjuh sha ki rangbah bad longkmie kiba la synniang ha ki rukom bapher bapher sha ki kam shnong.

Ka jingthmu jong kane ka prokram ka long ban iaphylliew jingmut halor ki kam shnong ba ban iakit ia bah iaka jingeh ka shnong ban myntoi ka imlang ka sahlang.

Kum ka jingpynshlur baroh ki khun jong ka dong, ka la don ka jingpynkup burom sha samla kiba wan shakhmat haki jingpule jong ki, shaki riew rangbah ka dong kiba la kynjoh 70 snem rta, ki nongthoh drama haki Bamphalar, ki nongthoh sur rwai haka nongrim ban pynshlur ia kiba bun ba lang ba bynta ban pynneh pynsah iaka Dustur ka Riti ba la hikai ki longshwa manshwa haka pateng kaba mynta.

La ioh ruh ka jingkren maitphang na u waheh Shnong ka Loompyrdi Iongpiah u RL Bimee Suwer uba la iathuh iaki kam ba la dep leh ka Shnong kumjuh ruh ki kam kiba la buh thong ban pyndep na bynta ka bha ka miat jong ka Shnong ka thaw.

Ula pynsngew ruh iaki kam ba ka Shnong ka la leh na ka bynta uwei pa uwei u nongshong Shnong khlem da niew shilliang bad ka kamram jong ki nongshong Shnong ban kyntiew iaka imlang sahlang na ka bynta ka bha ka miat jong ki nongshong Shnong.

Ka Kong Riianom Passah ka la pynkynmaw iaki kamram jong ki khun ka dong bad ka la ai ruh ka jingsneng jingkraw iaki samla ban don ka jingkitkhlieh bad ban iaid haka lynti jong ka Tip briew Tip Blei na ka bynta ka bha ka miat jong ka jingim jong ki bad ba kin lah ban kyrshan iaka iing ka sem kumjuh ka dong ka shnat bad iaka raid ka muluk.

La ioh ruh iaka jingkren na u G. Riang Pyrbot uwei na ki rangbah ba la dap 70 snem shaneng kumjuh na u K. Firstborn Laloo uwei na ki nongthoh Drama bad sur rwai bad na ka Dr. Sakani Donhi Kyndiah kaba shah pynkup burom haka liang ka pule puthi.

La pynphuh pynphieng iaka jingiakynduhlang da ki jingrwai jingshad na ka seng kynthei bad khun samla ka dong. Ha kane ka sngi la pynkhalai nusip haduh 10 tylli ban pynbyrngia ia ki nongwan iahsimbynta ha kane ka prokram.

Iaka jingialang la pyniaid da u samla Dasmear Suwer bad ka samla Iwakani Challam bad ka kyntiew ai khublei na u General Secretary ka Dong u Sienlangki Myrten.

La pyllait paidbah ruh iaki Ticket ‘Bumper Lucky Draw 2023’ ka ban pynkhalai haka Fete jong ka shnong ka ban long haka 22 bad 23 tarik Nohprah (December). Ka 1st Prize – T.2,00,000/- 2nd Prize – T. 1,00,000/- 3rd Prize – T.75,000/- bad ki Consolation Prize 5 tylli- Rs 5,000/- kawei bad ka dor jong ka ticket ka long 30 tyngka shisla bad shi book ka long 300 tyngka.