Pynlong ka Meghalaya ia ka jingjied nongialehkai Kayak bad Canoe ban ioh leit iakhun sha ka Olympic Games 2024 ha Paris
Da ka jingsngew sarong ka Meghalaya ka la ioh ban pynlong ia ka Indian Kayaking Canoeing Association (IKCA) selection trials ha Whitewater village ha ka 18 bad 19 tarik mynta u bnai ban jied sha ka kynhun na India ka ban leit iashim bynta ha ka ICF Canoe Slalom World Cup 2024, bad ka Kayak Cross events kaba dei kaba kongsan na ka bynta ka Paris Olympic Games 2024.
Haduh kumba 25 ngut ki nongiashim bynta na kylleng ka Ri India kaba kynthup ia ki kynhun ba tbit na Madhya Pradesh, Karnataka, bad Meghalaya ki la wan iashim bynta shitrhem ha kane ka jingiakop.
![](https://www.syllad.com/wp-content/uploads/2024/09/JIT-Vacancy-823x1024.avif)
Ha ka thup jingiakop K1 jong ki kynthei, ka Elizabeth Vincent na Meghalaya ka la wan ha ka kyrdan kaba lai, katba ha ka jingiakop Kayak Cross, ka Elizabeth ka la wan ha ka kyrdan kaba nyngkong.
Katba ha ka thup jingiakop K1 jong ki shynrang, u Batskhem Nongbak u la wan ha ka kyrdan kaba 6, u Pynshngaiñ Kurbha ha ka kyrdan kaba 8, Manbhalang Kharkrang ha ka kyrdan kaba 9. Katba ha ka thup C1 men’ category u Indra Sharma na Meghalaya u la wan ha ka kyrdan kaba hynriew.
Mynta kine ki nongialehkai kin ih ban mihkhma ia ka India ha ki rynsan jong ki ri ka pyrthei, kata da ka jingthmu ban ioh rung sha ka jingiakop Canoe Slalom Events ha ka Paris Olympics 2024.
![](https://www.syllad.com/wp-content/uploads/2024/05/Kayak-jpg.webp)
Ka jingpynlong ka Meghalaya ia ka ICF 2024 Canoe Slalom World Championships trials ka dei ka sienjam ka jingkiew shakhmat ban pynpaw ia ka jinglah jong ka jylla ban pynlong ia ki jingiakop kiba heh bad ia ka jingtrei shitrhem ban kyntiew ia ki jingialehkai kiba dei hapoh um ne water sports.
Mynta katei ka kynhun kaba la shah jied ban mihkhmat ia ka Ri India kan hap ban ia aireng pyrshah ia kiwei pat ki ri ha ki rynsan iakop kiba heh bad kane kan dei ruh ka sienjam kaba kongsan ia ki nongiashim bynta ban pynkhreh bha na ka bynta ban ioh rung sha katei ka rynsan Olympic.
![](https://www.syllad.com/wp-content/uploads/2024/05/Kayaking-2-jpg.webp)
Shuh shuh ka jingpynlong ia kane ka jingiakop ka pynpaw ba ka Meghalaya ka la kiew shaphrang ha kaba iadei bad kane ka jait jingialehkai sports bad ka ban long ruh ka sienjam kaba kongsan na ka bynta ki nongialehkai jong ka Ri ha ka jingiakhun ban ioh ia ka jngjop ha ka Olympic.
![](https://www.syllad.com/wp-content/uploads/2024/05/Kayaking-jpg.webp)
Leave a Reply