Pynlong ka Mowkaiaw Presbytery ïa ka jingïamareh bad jingpynshai paidbah pyrshah ia u drok
Ka Mowkaiaw Presbytery lyngba ka Social and Economic Life Development Committee ryngkat ka ophis treikam jong ka District Social Welfare Officer, West Jaintia Hills Jowai ka la pynlong ïa ka jingïamareh thong bad ka jingïalang pynshai paidbah haka 22 tarik u Jylliew.
Ïa kane ka prokram bakyrpang la pynlong ha ka shnong Mowkyndeng.
Kane ka jingïamareh thong kaba la sdang na Madankynsaw ka ïaid na Raliang na ka lynti sha Laskein bad pynkut pat ha Mowkyndeng. La wan ban ïashim bynta da kiba bun ki samla na ki shnong ba marjan kum na Raliang, Nongkynrih, Laskein, Mulum, Madankynsaw, Mowkyndeng bad kiwei kiwei.
Hadien kane la īoh ruh ïa ka jingïalang pynshai paidbah ha ka ïingdorbar jong ka shnong Mowkyndeng, ha ka jingïadonlang i Kong J Synnah, DSWO kaba la batai shai ïa ka jingangnud jong ka sorkar ban rat dyngkhong ïa ka jingkyrni ha ka jingdih droks. Ha ka juh ka por ka kyntu paidbah ban ïasnohktilang ban pynlong ïa ki shnong ki thaw kiba lait na u drok.
La ïoh ruh ïa ka jingbatai na ka Kong E. Niang, Laskein CHC, kaba la batai halor ka jingshah ktah ka met ka phad jong u ne ka briew kiba pyndonkm ïa ki jingdih pynbuaid bad kumno ban kiar na kane ka jingmlien ba buh jingma ïalade bad ïa kiwei.
La ïoh ruh ïa ka jingkren lyngkot na u Ma B Iano, MDC barim ka thaiñ, uba ai ïa ki kyntien sneng ïa ki samla na ka liang jong ki nongpynïaid shnong bad ki nongīalam shnong. U Rev. BD Shangdiar, Executive Secretary Mowkaiaw Presbytery u la ai ïa ka jingkren lyngkot bad jingduwai kyrpang na ka bynta kito kiba don hapdeng ka jingkyrni bad ki longïing kiba mad ïa kane ka jingeh.
La ïoh ruh ban sam ïa ki khusnam bad ka song pisa sha ki nongjop ha kane ka sngi haka jingmareh thong. Na kaliang ki shynrang la wan ba nyngkong da U Sanki Lyngdoh (Raliang), uba ar U Sandakirang Suchiang (Raliang), bad uba wan ba lai dei U Niwanki Tyngkan (Nongkynrih). Na ka liang ki kynthei pat iba wan nyngkong dei i Heiniwanki Nangbah (Nongkynrih), ïa ka khusnam ba ar la ïoh khur da i Darishisha Tyngkan (Nongkynrih), katba ïa ka kyrdan ba lai la ïohrah da i Apwyrta Dhar (Mulum).
La sam ruh ïa jingaisngewbha sha ki nongïashim bynta ba dang khynnah tam, ba la ïoh da ka Mebarika Synnah (Mowkyndeng) 13 snem ka rta bad rangbah tam u Damonmiki Tyngkan (Nongkynrih) 30snem ka rta. Ïa kane ka jingïalang la pynïaid da u Rev. LO Garod, ha ka jingïadonlang ki rangbah, ki longkmie bad ki nongshong shnong na kane ka shnong.
Facebook
Instagram
Youtube
Twitter
Leave a Reply