Pynlong ka MSACS bad MCSWA da ka Futsal Tournament ban rakhe ia ka National Youth Day

Syllad | The Rising MeghalayaFebruary 2, 2025

Ka Meghalaya State AIDS Control Society (MSACS), ryngkat ka jingiatreilang bad ka Mih-myntdu Community Social Welfare Association (MCSWA) ki la lah ban pynlong ia ka Futsal Tournament kaba ar sngi kynthih ha ka 30 bad 31 tarik Kyllalyngkot ha Chalton Futsal Ground, Moosalyngkat.

Ia kane jingialehkai la pynlong shibynta ka jingrakhe ia ka National Youth Day 2025, da ka jingthmu ban kyntiew ia ka jingpynsngewthuh halor ka jingpang HIV/AIDS hapdeng ki samla lyngba ki jingialehkai sports bad ka jingiadon bynta hapoh ka imlang ka sahlang.

Ia kane ka tournament la plie ha ka 30 tarik Kyllalyngkot ha ka jingiadon lang ki ophisar na ka Tnad Meghalaya State AIDS Control Society, ka District Sports Association bad ka Mih-myntdu Community Social Welfare Association (MCSWA).

Ha kane ka prokram la ia don lang ruh  u Dr. Khamjan Chyrmang, u riew pawkhmat hapdeng ki samla bad uba long ka nuksa uba la ai mynsiem shibun ia ki nongiashim bynta lyngba ki jingkren ai mynsiem ki jong u.

Baroh ki la don haduh 16 tylli ki team napoh ka thain ki ba la register ban iashim bynta ha kane ka tournament bad kiba la pynpaw ia la ki jong ki sap ki phong.

Ia ka nam lahduh la ioh rah da ka  Team East Block kaba la ioh khur ia ka song pisa kaba T.10,000, bud sa ka Team Wahlama kaba la ioh ia ka song pisa ba T.7000 bad ka Team Salini Colony kaba la ioh ia ka song pisa kaba T.5000.

Katba ha ka jingialang pynhap pyrda ha ka 31 tarik Kyllalyngkot la ia don lang u Bah Ajoy Lanong, Deputy Director, MSACS lem bad kiwei pat ki ophisar na ka tnad MSACS abd u Director bad staff jong ka MCSWA.

Ki nongkren ki la ban jur halor ka jingkongsan jong ki kam ialehkai sports na ka bynta ban tei ia ka koit ka khiah bad ban ialap bad pynshai paidbah halor ki lad jingiada na ka jingpang HIV/AIDS.

Ha kane ka prokram ka la don ruh ka prokram kyrpang da ka jingput jingtem kaba la iatreilang bad ka MGMP.