Pynlong ka NCW bad MBB da ka jingai jinghikai ban kyntiew ia ka seng kam hapdeng ki longkmie riewlum

Syllad | The Rising MeghalayaJuly 9, 2024

Ka National Commission for Women (NCW) bad Meghalaya Biodiversity Board ha ka 8 tarik Naitung ki la sdang ia ka regional workshop ba ar sngi halor ka Non Timber Forest Produce (NTFP) ha nongbah Shillong shibynta ban plie lad ia ka jingkiew ka ioh ka kot kaba iaineh bad kyntiew ia ka jingseng kam lajong ha ka nongrim NTFP hapdeng ki longkmie riewlum jong ka thain.

Ha ka jingsdang ia ka Regional Capacity Building Workshop bad Conference, ka  Chairperson, NCW, ka Rekha Sharma ka la ban jur halor ka jingkongsan jong ka jingkiew ka jinglaitluid ha ka ioh ka kot hapdeng ki longkmie ha nongbah Shillong.

Ka Sharma ka la pynshlur ruh ia ki nongiashim bynta ba kin pyndonkam ia ki jingdon jingem ka mariang ha ka thain kaba don palat 3000 jait ki jingthung ha ki khlaw ba kin tei ia ki kam ba iaineh. Ka la ong ba kane ka workshop ka long kum ka jingplielad ia ka jingiaineh jong ka ioh ka kot bad ka jingpynkupbor ia ki longkmie riewlum. 

U RS Gill, IFS, PCCF, bad HoFF ha ka jingkren u la kdew sha ki lad ban lap shuh shuh ia ki mar khlaw ba lah ban pyniaid ha ki iew hapoh bad shabar ri, bad u la kdew ruh sha ka bynta jong kane ka workshop ha ka jingkyntiew ia ki sap.

Ka Meenakshi Negi, Member Secretary jong ka NCW, ka la ban jur halor ka jingdonkam ban kyntiew ia ka jingseng kam lajong da ki longkmie riewlum ha ka thain shatei lammihngi kiba don nongrim ha ka NTFP. Ka la ong ba lyngba ka jingialam lynti, ka jingai jingmut bad ka jingkyntiew ia ki bor treikam, ki sienjam ba la shim da ka NCW, ki longkmie ki lah ban riewspah ha ki kam ba ki trei.

Ha kane ka prokram ba la pynlong ha ka State Convention Centre ha Shillong, la wan  iashim bynta ruh da ki nonglum, ki nongkhaii ia ki dawai tynrai, ki nongsumar tynrai, ki self – help group, ki nonglum NTFP bad ki nongrep na Meghalaya bad ki jylla ba marjan.

Ha ki bynta technical la don ki jingai jingmut na ki riewshemphang kiba kynthup ia ka Alka Bhargava, Dimpy Bora bad Pravin Bakshi, kiba la iakren shaphang ki iew bad ka jingpdiang ia ka teknoloji ha kaba iadei bad ki mar NTFP.

Ka workshop ka la peit bniah ia ka jingpynkhreh ia ki rukom treikam ban pyniasoh ia ki iew, kyntiew ia ki kam khaii lyngba ka jingpdiang ia ka teknoloji, bad ka jingpynkhreh ia ki kam ban pynbeit ia ki jingeh kiba iadei bad ka jingkhaii ia ki mar. Kiba iashim bynta ki la don ruh ka jingiamir jingmut ba la pynlong da ki riewshemphang bad kiba iadon bynta ha ki kam kiba kynthup ki State Women Commission, Forest, ki tnad AYUSH, bad ki riewshemphang ha ki kam bapher bapher. Kane ka jingiatreilang ka thmu ban plie lad ia ka ioh ka kot kaba iaineh bad kyntiew ia ka jingseng kam lajong ha ka non grim NTFP ha ki longkmie riewlum ha kane ka thain.

Ka sngi ba nyngkong jong kane ka prokram ka la sakhi ia ka jingwan iashim bynta da 250 ngut ki briew ba kynthup ki self help group, ki nongseng kam lajong, ki nongsumar tynrai, bad ki NGO na East Khasi Hills, Jaintia Hills bad Ri-Bhoi. Ha ka sngi ba ar yn don ki bynta shaphang ki jinglong jingman jong ki iew, ka jingpdiang ia ka teknoloji, ki jingeh ha kaba iadei bad ki jingkhaii mar bad ruh ka jingkyntiew ia ka kamai kajih.