Pynlong ka NEHUSU bad KSU da ka jingiakhih shah thngan ban banbor pyrshah ia u Vice Chancellor

Syllad | The Rising MeghalayaNovember 5, 2024

Ki samla pule ka North Eastern Hill University (NEHU) Shillong ha ka 5 tarik u Naiwieng ki la pynbna ban pynlong da ka jingiakhih shah thngan kaba khlem pud bad ka jingkhangdam ia ka skulbah baroh kawei naduh ka 6 tarik u Naiwieng 2024 ban pynpaw pyrshah ia ka jingbym shimkhia jong u Vice Chancellor (VC) ia ki mat jingdawa ki jong ki. 

Ia kane ka rai la pynbna da u General Secretary ka NEHU Student Union (NEHUSU) u samla Toniho Kharsati hadien ka jingiakynduh ia u Vice Chancellor ka NEHU, u Prof PS Shukla.   

U samla Toniho haba kren hadien ka jingialang u la ong ba watla u VC u la mynjur ban iakynduh ia ki samla pule hynrei um pat long satia uba kloi ban iakren halor ki jingdawa jong ki samla pule kiba la buh hakhmat jong u naduh u snem 2022. 

“U VC u la sngap mynthi bad um nud satia ban shim ia ka rai halor ki jingdawa kiba ngi la ai la bunsien lyngba ki dorkhas naduh u 2022. Kumta naduh lashai ka 6 tarik Naiwieng, ngin pynlong da ka jingshah thngan ba khlem pud bad ban khangdam ia ka NEHU campus tad haduh ba ki bor ba dei khmih kin shim ia ki sienjam ban pynurlong ia ki jingdawa ki jong ngi,” u la ong. 

U samla Toniho u la kyntu ruh ia ka Sorkar Jylla ba kan tuklar lem mardor bad ban thung noh ia u Vice Chancellor uba thymmai uba don ia ka jingkitkhlieh na ka bynta ka bha ka miat jong ki samla pule bad ka skulbah hi baroh kawei. 

Na ka liang u President ka KSU NEHU Unit, u samla Shibaitlang Rymbai u la ong ba ka Seng kan iaid shakhmat ia kane ka jingiakhih shah thngan da kaba iawer ruh ia ki para samla pule ka NEHU ban wan iasnohkti lang tad haduh ba u VC un shim ia ki sienjam ban pynurlong ia ki mat jingdawa jong ki samla pule. 

“Kine ki mat kim dei satia tang ki mat jong ki samla pule na ka jaidbynriew Khasi hynrei ki dei ki mat kiba ktah ia baroh ki samla pule na ki kynhun jaidbynriew bapher bapher kiba pule ha ka skulbah NEHU. Kumta Nga kyntu ia baroh ba kin wan iasnohkti lang ha kane ka jingiakhih shah thngan,” ong u samla Shibaitlang Rymbai.    

Shwa kane ka jingiakynduh, la pynlong ia ka jingiaid paidbah da ka Khasi Student Union (KSU) NEHU Unit bad ka NEHU Student Union (NEHUSU) na Central Library shapoh Administrative Block ban aiti ia ki jingdawa sha u VC. 

Kine ki mat jingdawa ki kynthup halor ka jingdawa ban weng kam ia u Registrar, Deputy Registrar bad kiwei ki ophisar ba shu thung beain da u VC ka NEHU, ka jingrem palat ka bai Hostel, ka jingbym biang ki Hostel bad ban thung mardor ia u Pro-Vice-Chancellor.  

Ha kajuh ka por na ka liang ka Meghalaya Tribal Teachers’ Association (MeTTA) jong ka NEHU ruh ka ai ka jingkyrshan kaba pura ia ka jingiakhih jong ki samla pule. Ki nonghikai ki la leit iakynduh ruh ia ki samla pule kiba iakhih shah thngan hakhmat ka ophis u Vice Chancellor.