Pynlong ka ophis DHO, East Jaintia Hills da ka iew pyni nam ia ki jingthung jingtep
Ka Ophis jong ka District Horticulture Officer, East Jaintia Hills District ha ka 14 tarik Jymmang, ka la pynlong da ka iew pyni nam ia ki jingthung jingtep kaba kynthup ia ki syntiew ki skud, ki soh ki pai bad ka jingpynmih umngap ia ki ba la pynmih na na district ha ka jingialang kaba la long ha phyllaw jong ka ophis District Agriculture Officer (DAO), Khliehriat.
Ha kane ka prokram la ia don lang ruh ka Director ka Tnat Horticulture ka sorkar Jylla ka Kong D Sohtun kum ka Kongsan ha ka jingiadon lang u Deputy Commissioner, East Jaintia Hills, u Abhilash Baranwal IAS, District Horticulture Officer ka District, u Bah DB Dhar nalor kiwei pat ki heh sorkar, ki nongrep bad kiwei kiwei.
![](https://www.syllad.com/wp-content/uploads/2024/09/JIT-Vacancy-823x1024.avif)
Haba ai jingkren ha ka prokram ka Kongsan ka la pynpaw halor ki jingthmu bad ka thong jong kane ka iew pyni nam ne exhibition da kaba ong ruh ba kane kam dei satia ka rynsan ha kaba ki nongrep jong ka district ki lah ban pyni ia ki jingthung jingtep ki jong ki, hynrei ka dei ruh ka rynsan iamir jingmut lang halor ki jingnang jingtip hapdeng ki nongrep na ki bynta bapher bapher jong ka district kiba rep bad thung ia ki jait jingthung bapher bapher.
Nalor kata ka pynshlur ruh ia ki nongrep kiba don ha kane ka sngi ba kin iatreilang hapdeng jong ki na ka bynta ban kyntiew ha ka jingpynmih ia ki mar rep bad ruh ba kin pyndonkam ia ki jingkyrshan ba ki la ioh lyngba ka sorkar ha ka liang ka rep ka riang bad ka thung ka tep.
Katba u Deputy Commissioner ka EJH ha ka jingkren u la ai khublei ia ka ophis DHO, EJH halor ka jinglah ban pynlong ia kum kane ka prokram ha kaba u la kyntu ruh ia ka ophis DHO bad ka DAO, EJH ba kin aijingiarap ia ki nongrep ka thain ha kaba iadei bad ka rukom rep kaba khlem ai dawai na ka bynta ki jait jingthung bapher bapher kiba iahap ba ka jinglong jingman jong ka mariang khnang ban lah ban kyntiew shuh shuh ia ka ioh ka kot hapdeng ki nongrep.
U Baranwal u la pynpaw ruh ia ka jingkmen ban iohi ia ka jingseisoh halor ka rukom rep ia u Tit hapoh ka district, da kaba kyntu ruh ia ki tnat ba dei khmih ba kin pynioh ia ki jingai jinghikai sha ki nongrep jong ka thain.
Kiwei pat kiba la aijingkren ha kane ka prokram ki kynthup ruh ia u DHO, EJHD u Bah DB Dhar, Assistant Director, Horticulture, u Bah SR Mulieh, Executive Engineer, Water Resources, EJH u Bah K Lamare bad ka Horticulture Development Officer ka Kong B. Rymbai.
Hadien kane ka prokram baroh ki dkhot kiba iashim bynta ha ka jingialam jong ka Director Horticulture ka Kong D Sohtun ki la pynlong ruh ka jingjurip ia ki 16 tylli ki stall ba la pynieng ha kane ka iew pyninam.
![](https://www.syllad.com/wp-content/uploads/2024/05/Exhibition-1-jpg.webp)
![](https://www.syllad.com/wp-content/uploads/2024/05/Exhibition-jpg.webp)
![](https://www.syllad.com/wp-content/uploads/2024/05/Crop-jpg.webp)
![](https://www.syllad.com/wp-content/uploads/2024/05/Exhibition-2-jpg.webp)
Leave a Reply