Pynlong ka ophis DSO West Jaintia Hills da ka ‘District Level Youth Exchange Programme 2023’

Syllad | The Rising MeghalayaOctober 4, 2023

Ka Ophis u District Sports Officer,  West Jaintia Hills District, Jowai haka sngi Balang kala pynlong ia ka “District Level Youth Exchange Programme 2023” halor ka mat “Building a Better World Partnering with Youth” hapoh Kiang Nangbah College Auditorium ha Jowai.

Ha kane ka prokram kaba ar sngi kynthih la sakhi ia ki jingiakop bapher bapher kaba kynthup ia ka jingiakop tyrko nia, ka jingkyntip, iakop dro bad airong, ka jingtem koitor bad jingput ktien (flute), jingiakop pynisap, drama, rwai ka shad nalor ka jingialang pynshai paidbah na ka na ka Ophis Skill Development bad DSWO.

La sdang ia ka prokram da ka jingpdiang sngewbha na ka bynta ki hynniew tylli ki high school bad sawtylli ki kolej napoh ka district.Kawei kawei ka skul bad kolej ki la phah mar 20 ngut ki khynnah ban iashim bynta ha ki jingiakop bapher bapher.

Haba kren u Ma Khroobok Passah,  District Sports Officer ka West Jaintia Hills District u la pynpaw ba kane ka prokram ka dei ka bynta jong ka jingialeh sports bad kiwei pat ki kam kiba iadei bad ki samla, kata kaba thmu ban pynshlur ia ki samla ha ki bynta bapher bapher jong ki jingiakop.

Nalor kata u la pynbna ruh ba ki nongjop na ka district level kin ioh ia ka lad ban leit ia aireng ha ka state level ka ban long ha ka 16 tarik mynta u bnai. U Ma Passah u la pynshlur ruh ia baroh ki nongiashim bynta ba kin ai ia kaba bha tam namar kiba wan shakhmat kin shah jied ban leit iashim bynta ia ka jylla bad ruh wat ha ka national level kumjuh.

Shibynta jong kane ka prokram la pynlong ruh ia ka jingiamir jingmut ba la lamkhmat da ka Phindarilyne Lyndem. Ha ka sngi kaba nyngkong jong ka prokram, la lah ban pynlong ia ki jingiakop bapher bapher, kynthup ia ka jingkyntip, jingdro, airong, tem koitor, jingput ktien, jingiatainia, jingiakop pyni sap nalor ka jingpynshai paidbah na ka liang ka ophis ka Skill Development.