Pynlong ka ophis DTO EKH da ka prokram sam jingbam tei met sha ki nongpang TB lyngba ka ‘Doctors For You’

Syllad | The Rising MeghalayaSeptember 8, 2023

Ka Ophis District Tuberculosis Officer, East Khasi Hills District mynta ka sngi ka la pynlong ia ka prokram halor ka jingpyllait ia ka Ni-Kshay Mitra Project ha East Khasi Hills District kaba iadei bad ka jingsam ia ki jingbam ba tei sha ki briew kiba pang TB lyngba ka kynhun Doctors For You hapoh Reid Provincial Chest Hospital Hall, Jhalupara, Shillong.

Ha kane ka sngi la ia don lang ruh ka Deputy Commissioner, East Khasi Hills, ka Kong RM Kurbah kum ka Kongsan.

Ka ‘Doctors For You’ ka bym dei ka kynhun ba don jingiadei bad ka sorkar ka la shim ia 100 ngut ki nongpang TB napoh EKHD ha kaba kin ai ka jingkyrshan ha ka liang ka bam ka dih ka ba tei na ka bynta jong ki ia kaba la bei tyngka da ka MYLAN Pharmaceuticals Pvt. Ltd, Bangalore.

Haba aijingkren ha ka prokram ka Kong RM Kurbah ka la ai khublei kyrpang ia ka kynhun “Doctors For You” halor ka jingshim ia kane ka sienjam ban iarap ia ki nongpang TB hapoh ka district bad kyrmen ruh ba kane ka projek kan iarap ban rat dyngkhong ia ka jingpang TB hapoh ka imlang ka sahlang bad ka ri hi baroh kawei.

Ha kajuh ka por ka kyntu ruh ia ki nongpang kiba ia don lang ha kane ka sngi ba kin dih tista ia ki dawai bad ruh ban shim ia ka kabu lyngba kane ka projek, kata lyngba ka jingioh pdiang ia ki jingbam ba tei ka ban long ka bynta kaba kongsan na ka bynta ka jingioh khiah na kane ka jingshitom.

Shibynta jong kane ka prokram na ka liang ka Kongsan ha ryngkat kiwei pat ki riewkhmat ki la aiti ia ki song jingbam ba tei sha ki nongpang.

Ha kane ka prokram la ia don lang ruh I Dr M Mawrie, State Tuberculosis Officer iba la aiti ia ka Ni-kshay Mitra Certificate sha ka Kong RM Kurbah, DC, EKHD.

Lah ban kdew ba ia ka  NI-KSHAY MITRA projek la pyllait da ka president ka ri India hapoh jong ka Pradhan Mantri TB Mukth Bharat Abhiyan ha ka 9 tarik u Nailur 2022 ban rat dyngkhong iaka jingpang TB ha u snem 2025. Kane ka projek ka pynthikna halor ki laibynta ki jingai jingkyrshan, kata kaba kynthup ha ka liang ki jingbam ba tei, ki lad jingsumar bad ha ka liang ka trei ka ktah.