Pynlong ka PTEDS da ka jingtam ia ki niut ki nier shibynta jong ka Panaliar Week

Syllad | The Rising MeghalayaDecember 29, 2023

Kumba ju long man la u snem ka Dorbar Shnong Panaliar mynta ka kynti ruh ka la pynlong ia ka taiew lehkmen lane ka “Panaliar Week” shwa kaba kut jong une u snem.

Shibynta jong kane ka jinglehkmen na ka liang ka Panaliar Tourism and Environment Development Societ (PTEDS) ka la pynlong ruh da ka jingiakop ban lum ia ki niut ki nier bad ki tiar plastik hapdeng ki khynnah rit.

Ia kane ka jingpynkhuid la pynlong ha Treriat bad la sdang naduh na u Mot u Woh Kiang Nangbah haduh ha Jingkieng nar.

Ka thong kaba hakhmat eh ha kaba pynlong ia kane ka jinglum ia ki niut ki nier ka long ban wanrah ia ka khuid ka suba bad ban pynrung ha ki jingmut jingpyrkhat jong ki khynnah halor ka jingdonkam ban pynneh pynsah ia ka jingkhuid jingsuba.