Pynlong ka SURE da ka rynsan ïamir jingmut ban ïatai halor ka kam rep tynrai ha Sohmynting

Syllad | The Rising MeghalayaFebruary 19, 2022

ka Society for Urban and Rural Empowerment (SURE) ha ryngkat ka jingïatreilang jong ka North East Slow Food and Agrobiodiversity Society, Shillong kala pynlong ïa ka jingïamir jingmut ban ïatai halor ka kam rep tynrai. Kane ka Agroecology Learning Circle Workshop kaba la pynlong haka shnong Sohmynting haka 18 tarik u Rymphang.

Kane jingiatai halor ka kam rep ka dei shi bynta jong ka prokam kaba la bei pisa da ka World Bank lyngba ka Meghalaya Basin Management Agency, Shillong.

Ki Agroecology Learning Circles (ALC) kiba dei ki kynhun nongrep kiba pyndonkam ne kiba dang pyrshang ban pyndonkam da ka rukom rep tynrai bad ka jingthmu bakongsan hi ka long ban jop ïa ki jingeh jong ki nongrep da kaba pyndonkam da ki jingstad tynrai kiba la don naduh mynhyndai bad kiba ki nongrep ki leh ha kine ki sngi ruh. Ka jingthmu ka long ba kine ki ALC kin ïakynduh man ka por ban ïakren shaphang ki jingeh jong ki bad ban wad ki lad ban jop ïa kita ki jingeh jong ki. Ha kine ki shisnem ka kam kaba kongsan jong ki ALC ka long ban sdang pyrshang ïa ki buit kiba ki ïoh ban ïaleh pyrshah ïa ki khniang kiba bun jait kiba ban ïa ki jingthung jong ki bad ha kajuh ka por ruh ban wad ki lad ki lynti kumno ban pynsboh biang ïa ka khyndew kaba la tyrkhong.

Ki nongrep tynrai na ki saw tylli ki shnong kaba kynthup ïa kiba naka shnong Larnai, Ksehrynchang, Lumtrep Nongjngi bad naka shnong Sohmynting kiba hap hapoh ka block Thadlaskeñ kila wan ban ïashim bynta ha kane ka jingïamir jingmut.

Ha kaba bynta ba nyngkong jong kane ka jingïakynduh ki nongrep kila ïathir jingmut ban wad ki lad ki lynti kumno ban pynjem ïa ki jingeh kiba ki ïatyngkhuh ha kaba trei ïa ka kam rep kam riang jong ki. Ha kane ka pali kaba nyngkong ki nongrep kila ïathuh ïa kiba bun ki jingeh jong ki kaba kynthup ïa ki khniang kiba bun jait kiba bam ïa ki jingthung jong ki bad ha kajuh ka por kila ïasam ruh ïa ki buit kiba ki pyndonkam haba ki pyrshang ban tem ïa kane ka jingeh. Kumjuh ruh la ïakren halor ka jingshah ktah jong ka khyndew kaba long ka daw kaba la pynhiar ïa ka rep ka riang bad khamtam kaba pynduna ïaka jingpynmih soh jong ki jingthung. La ïakren ruh ha kaba ïadei bad ka jingeh kaba ki nongrep ki ïakynduh khamtam ban ïoh ïa ki symbai bad ki lad ki lynti kumno ba kin kunai kin kynshew ïa ki symbai tynrai kiba don ha ki shnong ki thaw jong ki.

Uma Dapmon Shadap uba long uwei na ki nongrep naka shnong Larnai ula ong ba ka jingeh jong ki ka long ba kala tyrkhong ka khyndew bad ka daw jong kane ka jingtyrkhong ruh ka dei na ka jingpyndonkam sboh phniang ki nongrep. Naka liang jong ki kila pyrshang ban pynim biang ïa ka khyndew da kaba pyndonkam ïa ki sboh kiba ki ïoh nala ka jong ka shnong. Ka kong Sdangroilangki Kam kaba na ka shnong Lumtrep, Nongjngi kala ïasam ïaka buit kaba ki pyndonkam ha kaban pynïap ïa u Ñiang byrnai uba pynjulor ïa u sying bad u phan ba ki rep.

Ïa kane ka rynsan jingïamir jingmut la pynïaid da u Bah Khraw Wahlang Adviser jong ka NESFAS, ka long Gracia Dkhar kaba dei ka lead associate jong Agroecology bad u Dr Bhogtoram Mawroh Senior Associate Research and knowledge management centre jong ka NESFAS. Ha kane ka sngi la ïoh ruh ïa ka jingkren na u Dr H.H.Mohrmen uba long u Chairman jong ka NESFAS, ka Daka Bareh na ka SURE bad ïa ki kyntien pdiang sngewbha na ka shnong la ai da u ma Mynjur Pyrtuh uba long u General Secretary jong ka Dorbar Shnong Sohmynting.