Pynlong ka TRAI da ki COP bad workshop ban ai jingtip sha ki paidbah halor ki sienjam ba ka la shim

Syllad | The Rising MeghalayaJune 28, 2024

Kawei na ki jingthmu ba kongsan jong ka Telecom Regulatory Authority of India (TRAI) kalong ban iada ia ka bha ka miat jong ki briew bad ban ai jingtip sha ki briew. Ha kaba iadei bad kane ka thong, ka TRAI ka la pynlong ia ki Consumer Outreach Programme (COP), ki workshop halor ka jingpynkhlain ia ka bor treikam jong ki kynhun kiba iadei bad ki nongthhied jingthied bad ki seminar bad kiwei kiwei ba iadei bad ka bha ka miat jong ki briew bad ka jingiada.

Ha kane ka bynta, ka TRAI (Regional Office Kolkata) ha ka 27 tarik Jylliew ka la pynlong ia ka COP ha Nongtalang College, Nongtalang, West Jaintia Hills district, Meghalaya ban ai jingtip sha ki paidbah halor ki sienjam bapher bapher ba la shim da ka TRAI ban iada ia ka bha ka miat jong ki briew. Nalor ki paidbah, la iashim bynta ruh ki riew pawkhmat ba la shah khot sngewbha, baroh ki Telecom Service Provider.

Ka Kong G Shabong CCA, NE-I, Department of Telecom ka la plie ia ka jingialang kum ka kongsan bad u D. Pandey, SDPO, Amlarem u la long u symbud kongsan. U Dr. Ryan Reid Kharkongor, Principal, Nongtalang College, Nongtalang u la long nongshah khot sngewbha ba kyrpang ha kane ka jingialang.

Na ka liang ka Kong Shabong ha ka jingkren kum ka kongsan ka la ban ia ka jingdonkam jong kum kane ka prokram ai jingtip ha ki jaka kiba don sha kyndong bad kiba jngai kum ka Nongtalang. Ka la kyrpad ia ki samla pule ban long kiba laitluid ban pynsngew ia ki jingeh jong ki shaphang ka jinglong ka network ha kane ka prokram khnang ban lah ban weng ia ki jingeh.

Ha ka jingai jingkren, u Dr. Ryan u la iaroh ia ka sienjam ba la shim da ka TRAI ban pynlong ia kum kane ka prokram ai jingtip na ka bynta ka bha ka miat jong ki briew ha ka thain Nongtalang, ka shnong kaba kham jngai. Kum ka jaka pule u la ban ia ka jingkongsan ban don ka jingpyniasoh mobile kaba bha ha jaka jong ka college bad u la kyrpad ia ki nongai jingshakri ban pynthikna ia ka jingpyniasoh kaba bha ha ki por ban wan. Haduh mynta, ka jingdon ki mobile network kalong kaba dang duna ha ka thain bad kam don ka line kaba pura.

Na ka liang u Pandey u la kyrpad ia ki samla pule kiba don ha ka jingialang ba kin ai ka jingsngew jong ki shaphang ka jinglong ka network ha kane ka thain. Kum kine ki jingai jingmut kin iarap ia ka TRAI bad kiwei kiwei kiba don bynta ha kane ka kam ban weng ia ki jingeh.

Ha kane ka prokram, lyngba ka jingpynshai jong u Debjit Saha, SRO, TRAI, ki nongiashim bynta ki la ioh jingtip shaphang ki kyndon kiba iadei bad ki nongthied jingthied, ki jingbthah bad ki hukum ba iadei bad ki Value Added Services (VAS), Unsolicited Commercial Communications (UCC), Mobile Number Portability (MNP), Complaint Redressal Mechanism, Data services and Tariff bad kiwei kiwei. Ki nongiashim bynta ki la ioh jingtip ruh shaphang ki jingmyntoi jong ki Mobile App bapher bapher (TRAI MySpeed app, TRAI DND 3.0 app bad kaTRAI Mycall app), Tariff portal bad ki Network coverage map ba la shna da ka TRAI ban pynkupbor ia ki briew bad kumno ki briew ki lah ban shim kabu ia kine ki app/rynsan. Ki nongiashim bynta ki la ioh jingtip ruh shaphang ki jingai jingmut bapher bapher jong ka TRAI ban plie lad ia ka jingkyntiew ia ki kam telecommunication bad shaphang ki kyndon/ ki jingbthah ba thymmai jong ka TRAI halor ka UCC bad kumno ba kin long kiba husiar ha kaba iadei bad ki kam thok kum ka jingthok ha kaba iadei bad ki tower, ki message bad ki jingphone ba ialam bakla bad kiwei kiwei.

Nalor kata la ioh ruh ka jingpynshai na u D. Pandey, SDPO, Amlarem, tnat Pulit Meghalaya halor ki kam beain lyngba ka bor internet bad ki sienjam ba iadei bad ka jingshngain ha kaba u la ban ruh ia ki bynta ba dei ban leh bad ban kiar da ki nongshong shnong ban iada ialade na ka jingngop ha ki kam beain lyngba ka bor internet.

Ka la don ka jingpynshai halor ki projek USOF, kynthup ka BharatNet bad ki projek 4G Saturation ha Jylla Meghalaya da u A. Das, O/o CCA TRAI. Ha kane ka jingpynshai la pyni ia ka jingiaid shaphrang jong ki projek USOF ha kane ka jylla.

U Ashim Dutta, Jt. Advisor, TRAI u la kren halor ka phang ba iadei bad ka rynsan Sanchar Saathi (sancharsaathi.gov.in), ka rynsan ba phaikhmat sha ki nongshong shnong ba la shna da ka DOT. La pynshai shaphang ki atiar bapher bapher kum ka “Chakshu” (ka jingai jingtip ba ialam bakla), CEIR (ka mobile ba la jah lane shah tuh), TAFCOP (ka  jingdon ki mobile connection) bad kiwei kiwei, kiba long shi bynta ka rynsan Sanchar Saathi.

Hadien ka jingpynshai ka la don ka jingialang iamir jingmut ha kaba la jubab ia ki jingkylli jong ki nongiashim bynta ba iadei bad ki bynta bapher bapher jong ki jingai jingshakri telecom da ka kynhun jong ka TRAI/TSP.