Pynlong klas 40 sngi shuwa ka eksam ong ka HYC iaka Pro Vice Chancellor ka NEHU

Syllad | The Rising MeghalayaMay 20, 2020

Ka Hynniewtrep Youth Council (HYC) Cell bad ka HYC NEHU mynta ka sngi ki la leit ban iakynduh ia u Pro Vice Chancellor ka skul bah NEHU bad aiti ruh iaka dorkhat halor kiba bun ki jingeh jong ki samla pule UG bad PG haka Jylla naduh ba la don ka jingkhang khyrdep iaki kolej bad ki skul hapoh ka Jylla.

Ha kane ka jingiakynduh la iakren halor ka jingthmu ban pynlong iaki Examine haka Jylla katkum ka jingbthah na ka University Grant Commission (UGC) kata ha u Naitung (July).

Ka HYC ka la ong, ha kum kane ka por ba ka Ri India bad ki Jylla ki dang shah ktah jur ha khlam jingpang COVID-19 kan nym long kaba suk iaki samla pule ka Jylla ban leit thoh iaki Examine lada jia ba ki bor pyniaid jong ka NEHU kin pynlong iaka Examine ha u Naitung.

Kumta ka HYC lyngba ka dorkhat ka la ai jingmut iaki bor pyniaid jong ka NEHU ba kidei ban da pynlong shwa iaki physical class la kumno kumno 40 sngi ha shwa ka jingpynlong iaki Examine khnang ba ki samla pule kin ioh iaki jingbatai naka bynta ki lynnong kiba kham khongsan.

Kim dei ban pynlong ia kino kino ki online Examinations hynrei kidei beit ban pynlong iaki Examine ba ki samla kin lah ban wan thoh hi ha la ki Centre khnang ba ki samla pule kiba don ha ki thain nongkyndong kin nym iakynduh jingeh.

Ka la ai jingmut ruh iaki bor pyniaid NEHU ban pynjynsur bad ai kylluid por iaki tarik na bynta ban siew iaki bai Semester bad bai Examine jong ki samla pule kumjuh ban map iaki bai Semester bad Examine lada jia ba don ba ki samla kiba wan na ki longiing ba kyrduh bad kynduh jingeh ban siew iaki bai jingpule.

Ki bor pyniaid jong ka University hashwa ban pynbna iaki tarik ban pynlong iaki Examination kidei ban da pyntikna ba ki khynnah pule kin nym don jingeh ban wan thoh iaki Examine.

La ai jingmut ruh iaki bor pyniaid ka University ban thaw mardor iaka COVID-19 Task Force naka bynta ban peit bad sngap iaki jingeh jong ki samla pule kiba don ha kylleng ka Jylla ha kaba iadei bad ki jingpynlong iaki Online Classes bad kumjuh ki Examine.

Nalorkata, lada jia ba hap pynlong iaki Examine hakum kane ka por ba dang don ka jingpynjari iaka jingkhangdam bad ka pyrkhing iaka iaid ka ieng, ki bor pyniaid jong ka University kin iakren bad ka tnad pule puthi jong ka sorkar Jylla ban shah iaki samla pule ban pyni tang daki ID card lane ki Admit card haki check point jong ki Inter District khlem da donkam ban Apply Car Pass na bynta ka leit ka wan.

Ban pyntikna ba ki samla pule kiba dei nabar Jylla bad bar Ri kiba wan pule hapoh kane ka skul bah kidei ban poi shwa 15 sngi shwa ka Examine na ka bynta ban shong Quarantine bad ba kin pynkhuid bad synreit dawai shwa iaki hostel bad ki Examination Hall ha shwa ban pynlong iaki Examine.