Pynlong KVK Jaintia Hills iaka mela ki nongrep Krai bad iaka World Soil Day

Syllad | The Rising MeghalayaDecember 6, 2023

Ka Krishi Vigyan Kendra, Jaintia Hills, Wahiajer haka 5 tarik Nohprah ka la pynlong iaka mela ki nongrep krai ne ka Millet Kisan Mela bad World Soil Day ne ka sngi kyrpang ban ialap iaka jingkongsan ka khyndew/. Ka mat pdeng kalong “Soil and Water: A Source of Life”, ne ka khyndew bad Um ki tynrai jong ka jingim.

Ha kane ka sngi la donlang ki nongrep na ki artylli ki district jong ka East Jaintia Hills District bad West Jaintia Hills District haka jingialang kaba la long ha phyllaw ka ophis KVK kaba don ha Wahiajer, West Jaintia Hills District.

U District Horticulture Officer u Bah S Rani haka jingkren ula ong u krai u iarap ha kiba bun ki jait jingpang bad ula kyntu iaki nongrep ban phai dieng biang bad pyrshang ban pynroi bad thung ia u krai khnang iaka bam ka dih ban ban tei iaka met ka phad. Ula ong ba u krai u iarap ruh ia ki briew kiba don jingpang shini.

Ula pyntip ruh ba hapoh ka Agriculture la pynmih ia kawei ka Directorate of Food Processing kaba ki nongrep ki lah ban shna ia u krai bad ia kiwei kiwei ki mar rep mar riang ha kata ka rukom kaba bit ba biang namar ka jingdawa ia u krai kamdei tang hapoh ka jylla hynrei wat Shabar ka jylla ruh.

Ka Kong Lucy Lakiang District Agriculture Officer, East Jaintia Hills District ka la kren halor ka jingdonkam ban bad iada bad pynneh pynsah iaka mariang bad iaki um ki wah namar kidei ka tyllong jong ka jingim briew.

Shwa kane la ioh ka jingkren pdiang na u Dr. D Pasweth Senior Scientist & Head, ka Kong T. Surong na ka Shnong Khanduli ka la batai iaka jingshem jong ka haka jingrep krai.

Haka kylla kaba ar la don ka jingai jinghikai halor ka jingai jingmyntoi u krai iaka khyndew bad ka tynrai ka jingim bad ka jingkongsan u krai na ka bynta ka jingbam ba tei iaki mrad mreng.