Pynlong prokram ai jinghikai ka MSLSA na ka bynta ki nongiasaid ain kiba iarap halor ki kam ain

Syllad | The Rising MeghalayaOctober 6, 2024

Ka Meghalaya State Legal Services Authority (MSLSA) bad ka Meghalaya State Judicial Academy ha ka 4 tarik u Risaw ki la pynlong ia ka ‘Orientation Training Programme’ ba shi sngi na ka bynta ki Legal Aid Defense Counsels kiba hap hapoh ka Legal Aid Defence Counsel System (LADCS) hapoh Auditorium jong ka Iingbishar High Court ka Meghalaya ha Shillong.

U Justice HS Thangkhiew, nongbishar ka High Court ka Meghalaya bad Executive Chairman ka MSLSA uba long u Kongsan ha kane ka sngi ha ka jingkren u la pynpaw ia ka jingthmu pynkylla dur ha lyndet jong ka Legal Aid Defense Counsel System. U la ban jur ba ka rukom treikam jong ka ain ka pynthikna ba ka hok ka long ban pynioh ia baroh bad ym tang na ka bynta ki katto katne.

Kane ka rynsan ka thmu ban pynbha ia ka jingdon bad ka jinglah ban ioh ia ka jingiarap ha ka liang ka ain, ban aijingmut ha ka por kaba biang bad ban pynioh ia ka rukom treikam kaba tbit ha kaba pyniaid ia ki mukotduma. Kane ka thmu ruh ban pynioh ia ka jingshakri kaba bha tam ha ka liang ka ain naduh ka por ba shah kem lyngba ki jingujor bad ban pynthikna ia ka jingleit jngoh ba khah khah sha ki jaka set ban pynbiang ia ki jingdonkam kiba iadei bad ka ain jong ki koidi ki bym don ki ban mihkhmat na ka byna jong ki.

U Justice Thangkhiew u la pynpaw ruh ia ka jingdonkam jong ka ain bad ka bynta jong ka NALSA ban pynthikna halor ka jingpynioh ia ka hok na ka bynta baroh.

La pynkynmaw ruh ia ki nongiashim bynta ba ia ka LADCS la plie paidbah nyngkong ha ki khyndai tylli ki district ha ka 24 tarik u Jylliew 2023 ha Patharkhmah Government Higher Secondary School, Ri-Bhoi district, bad ia ki jingmyntoi jong ka naduh katei ka por la pyniar sha baroh ki district ka Jylla.

U la bynrap ruh ba ka skhim LADCS ka ailad ia ki samla nongiasaid ain ban ioh ia ka jingshemphang kaba kongsan hapoh ka iingbishar bad ka thmu ruh ban pyniasoh bad ki samla pule ain lyngba ki internship bad ki clinic jong ki skul ain.

Kine ki samla pule kin ioh ia ka jingshemphang kaba treikam shaphang ka ain kam bymman, ki buit ban iada, bad ka jingwad bniah halor ki kyndon ain ha ki mukotduma bapher bapher.

Ki katto katne ki bynta kiba ki samla pule ki lah ban iashim bynta ki kynthup halor ka jingpynlong ia ka jingwad bniah halor ki ain kam bymman, ka jingjurip ha ki jaka ba la jia ki kam bymman, ban iakren bad ki briew ba shah kynnoh bad kiba haiing hasem jong ki bad ruh bad kiwei pat ki briew ba don jingiadei, ka jingleit jngoh ia ki phatok bad ki jaka aijingiarap halor ki kam ain, ban iashim bynta ha ki jingialap halor ki kam ain, bad ka jingiarap ban bishar bniah ia ki sakhi ba la lum da ka liang ba shah pynngat ban aijingmut na ka bynta ban pynkhreh ia ki buit iada.

U Justice Thangkhiew u la batai ia ka rukom aijingiarap halor ka ain kum kaba kham palat ban ia ka rukom aijingiarap da kaba khot ia ka kum ka jingshai jong ka jingkyrmen kaba pynthikna ba uwei pa uwei u nongshong shnong khlem da khein ia ka kyrdan ha ka imlang sahlang kin don ia u nongiasaid ain ban iaid lyngba ia ki jingeh kiba iadei bad ka ain na ka bynta ban iada ia ki hok ki jong ki.

Kiba la ia don lang ha kane ka sngi ki kynthup ruh ia u Justice W. Diengdoh, nongbishar ka Iingbishar High Court ka Meghalaya bad Chairman ka HCLSC bad u Justice B. Bhattacharjee, Additional Judge ka Iingbishar High Court ka Meghalaya bad kiwei kiwei. Ka prorkam ka kynthup ruh iaka technical session kiba iadei bad ka aiñ.