Pynlong prokram ïit sap ialehkai ka MSOA ha Mairang

Syllad | The Rising MeghalayaJuly 20, 2022

Ka Talent Identification Programme kaba long ka prokram ïit sap ialehkai ba la pynlong da ka Meghalaya State Olympic Association (MSOA) ha ryngkat ka jingiatreilang jong ka tnat Sports & Youth Affairs jong ka sorkar jylla bad ka EDGE 10 Group ka la sakhi ia ka jingwan iashimbynta jong kiba bun ki khynnah pule ka thain ha ka prokram ba la pynlong mynta ka sngi ha Madan Mot Tirot, Mairang Mission, Mairang.

Ha ka jingialang plie ia kane ka prokram la wan ban sakhi da u Working President ka Meghalaya State Olympic Association (MSOA), u Bah John F Kharshiing, u Deputy Superintendent of Police (Headquarters) ka Eastern West Khasi Hills District, u Bah H. Kharkongor, u Syiem ka Hima Nongkhlaw, u Pa’iem P.M Syiemlieh, u rangialehkai na ri Australia uba la ju iashimbynta ha ka lympung Olympics, u Ian Campbell, ki nonghikai, ki khynnah pule ka thain bad kiwei kiwei.

Kane ka prokram ïit sap ialehkai, ia kaba la pynlong da ka jingthmu ban lap ia ki riewdonsap ha ka kam ialehkai na baroh khat ar tylli ki distrik ka jylla Meghalaya, ka la sakhi ia ka jingiashimbynta ba shitrhem jong ki khynnah pule ka thain kiba la iakhun ha ki jingialehkai kum ka Compass Drill, Vertical Jump, 20 Meter Sprint, 10 Metre Ladder Run bad kiwei de.

Ia kane ka kam ïit ia kiba donsap haka kam ialehkai la ialam khmat da u Ian Campbell, u Olympian (1980 Moscow Olympics) uba la thaw ia ka world record ha kato ka por bad u Alistair Tait, Global International Coach na Australia.

Katkum ka program kane ka program Talent Identification testing program kan poi ha baroh ki District Headquarters. Ha Nongstoin kan long lashai ka sngi, Nongpoh 22 tarik Naitung, Jowai 23 tarik Naitung, Khliehriat 25 tarik Naitung, bad ar sngi 26- bad 27 tarik ha sor Shillong ha SAI, NEHU. Lai tylli ki jaka kiba la dep pynlong iaka Talent Identification Programme ki kynthup iaka Williamnagar, Resubelpara nalor ka Mairang.