Pynlong prokram ka DLSA, SWKH halor ki lad jingiada na ka bynta ki khynnah

Syllad | The Rising MeghalayaAugust 28, 2023

Ka Ophis jong ka District Legal Services Authority, South West Khasi Hills District Mawkyrwat ha ka 26 tarik mynta u bnai ka la pynlong ia ka prokram pynshai paidbah halor ka mat “NALSA (Child friendly Legal Services to children and their Protection) Scheme 2015 bad Juvenille Justice (Care and protection of Children) Act 2015” hapoh Rising Secondary School, Sohkhyllam, SWKHD  Mawkyrwat.

Haba kren ha ka prokram ka Kong D Sohtun, CJM & Secretary DLSA, SWKHD ka la ong ba ka jingpynlong ia kane ka prokram pynshai paidbah ka long ban pynsngewthuh sha ki paidbah kumjuh ia ki kynhun kiba don bynta halor ki hok jong ki khynnah bad ki lad jingiada na ka bynta jong ki.

Ka la ong ruh ba ka NALSA (Child friendly Legal Services to children and their protection) Scheme 2015, ka pynkupbor halor ki hok bad ki jingmyntoi kiba dei ban pynioh sha ki khynnah bad ban pynsngewthuh ruh ia ki halor ka jingdonkam ia ia ki hok ki jong ki hapoh ki riti synshar khadar bad ha ki kyndon ain bapher bapher, kata kum ka Child Marriage Restraint Act, Child Labour Prohibition Act, Juvenille Justice Act, POCSO Act, bad kiwei kiwei.

Nalor kata ka la pynpaw ruh halor ka jingdonkam ban pynioh ia ki hok jong ki khynnah kumba la pruid dak ha ki riti synshar khadar bad ki polisi treikam jong ka sorkar na ka bynta ban iada ia ki hok ki jong ki.

Kumjuh na ka liang u Bah SR Kharkongngor, District Child Protection Unit, SWKHD, ha ka jingkren u la ong ba ka ‘Juvenille Justice (Care and Protection of Children) Act, 2015’ ka la sdang ban treikam naduh ka 15 tarik u Kyllalyngkot 2016, bad la pynduh ia ka Juvenille Justice, Act ha u snem 2000.

Kane kas Act ka khmih halor ki mat kiba iadei bad ki khynnah kiba iatyngkhuh bad ka ain bad ki khynnah kiba donkam ia ki lad jingsumar bad jingiada da kaba pynbiang ia ki lad jingsumar bad ki jingdonkam ki jong ki, bad ruh ban shim da ki sienjam ki ban pyniajan ia ki khynnah.

Kane ka Act ka thmu ruh ban pynduna ia ki kam bymman ba la leh da ki khynnah kiba hapdeng ka rta 16 haduh18 snem rta.

Ia kane ka prokram la pyniaid da u Bah K. Wanniang, Headmaster ka Rising Secondary School, Sohkhyllam.