Pynlong prokram ka ophis DPO halor ka Meghalaya Right to Public Services Act

Syllad | The Rising MeghalayaJune 28, 2024

Ka ophis u District Planning Officer, East Jaintia Hills District, Khliehriat ha ka 27 tarik Jylliew, kala pynlong ia ka prokram pynshai paidbah halor ka Meghalaya Right to Public Services Act, 2020, ha ka jingialang kaba la long hapoh NIC Conference Hall, jong ka ophis u Deputy Commissioner.

Ki resource person kiba la ia don lang na ki tnat bapher bapher kaba kynthup na u ophisar ka Tnat District Disaster Management EJH u Bah D Lyngdoh, na ka District Informatics Kong I Rymbai, Sub-Inspector of Supply, Bah M Sohkhlet, bad e-District Manager Bah R. Pohrem kiba la kren halor kiba bun ki mat kiba iadei bad ka “Meghalaya Right to Public Services Act, 2020.”  

U Bah D Lyngdoh haba aijingkren halor kane ka Act u la kdew ia ka list jong ki jingai jingshakri kiba don hapoh kane ka Act, bad u la pyntip ruh halor kiba bun kiwei pat ki kyndon ba la pyntreikam hapoh kane ka Act ha kaba ki ophisar ba dei khmih ki lah ruh ban ngat ha ka jingshah pynshitom, dain kuna bad siew ia ka bai lutksan bad kiwei pat.

Nalor kata ula pynpaw ruh halor ka hok jong ki nongshong shnong ban kyrpad sha ka Meghalaya Right to Public Services Commission lada jia ba u ne ka kim ioh ia ka jingshakri kaba ki donkam na ki ophis ba dei khmih hapoh ka por ba la buh.

Na ka liang ka District Informatics Officer, EJH, ka Kong I Rymbai ka la ai ka jingpynshai halor ka jingkongsan ha ka jingshakri lyngba ki kor ki bor jingstad jong kane ka juk ba mynta.

Kiwei pat kiba la aijingkren ha kane ka sngi ki kynthup ruh ia u Bah R Pohrem e-District Manager, Sub-Inspector Supply, EJH u Bah M Sohkhlet bad kiwei.