Pynlong SHG Mela bad Health Camp ka ophis u BDO Mairang

Syllad | The Rising MeghalayaOctober 22, 2021

Kum shibynta jong ka jingrakhe iaka jingdap 50 snem jong ka jylla Meghalaya, ka ophis u Block Development Officer, Mairang C&RD Block ha ryngkat ka jingiatreilang jong ka Meghalaya State Rural Livelihood Society( MSRLS) mynta ka sngi ka la pynlong ia ka Self Help Group (SHG) Mela bad Health Camp ha Madan Mot Tirot, Mairang  Mission, Mairang haka sngi Thohdieng.

U Lamphang ka ïing Dorbar Thawain ka jylla uba long ruh u MLA ka thain, u Bah Metbah Lyngdoh u la long u kongsan ha ka jingdon ryngkat u EM ka KHADC ba dei peit ia ka tnat Elaka uba long ruh u MDC ka Mawthadraishan, u Bah Jambor War uba la wan kum u symbud kongsan.

U Bah Metbah u la ong ba ka jingthmu jong ka National Rural Livelihood Mission (NRLM) kala long ban kyntiew ia ka ioh ka kot jong ki paidbah kiba shong ha ki thain nongkyndong bad u la kyntu ruh ia baroh ba kin shimbynta ryntih ha ki prokram hapoh kane ka mission na ka bynta ban kyntiew ia ka ioh ka kot  ka jongki.

U la ong ruh ba ka sorkar ka iai bteng ban pyntreikam pura ia ki skim bad prokram bapher bapher kum ka NRLM ban kyntiew ia ka ioh ka kot jong ki  paidbah bad u la pynpaw ruh ia ka jingsngewkmen ban iohi ia ka jingioh jingmyntoi jongki lyngba ki SHG ia kiba la la saindur lyngba ka NRLM.

Haba kren halor ka jingdap 50 snem jong ka jylla Meghalaya, u Bah Metbah ula kyntu ia ki paidbah nongshong shnong ba kin iai bteng ban ia snohkti lang bad ka sorkar  ha ki prokram pynroi bapher bapher jongka na ka bynta ka roi ka par  jong ki paidbah nongshongshnong ka jylla.

U Bah Metbah u la kyntu ruh ia ki paidbah nongshong shnong ki bym pat shim ia ka tika iada COVID-19 ba kin leit ai ia ka tika namar dei tang ka tika kaba long ka lad ban iada na ka jingsaphriang jong kane ka khlam ha ka ri bad ka jylla.

U Bah Jambor War, ha ka jingkren jong u, u la kren halor ka jingiadon bynta jong u bad ki SHG ha ki por ba la leit noh bad la ong ruh ba ki paidbah nongshong shnong, khamtam ki riew kynthei ki ioh jingmyntoi shi katdei eh na ka jingdon jong ki SHG kiba plielad ia ki ba kin iashimbynta haka roi ka par bad ka ioh ka kot jong ka jylla.

Ha kane ka prokram la sakhi ruh ia ka jingpynshai paidbah halor kiba bun ki skim sorkar bad la iohi ruh ia ki jingshad, jingrwai bad ki skit da ki dkhot  jong ki VO bad SHG bapher bapher jong ka Mairang Block. La ioh ruh ban sam khusnam sha ki VO bad SHG bapher bapher ha kane ka prokram.

Kiwei pat kiba la iadon lang ha kane ka prokram ki kynthup ia u syiem jong ka Hima Nongkhlaw, u Paiem PM Syiemlieh, u Additional Deputy Commissioner ba dei peit ia ka Mairang Civil Sub-Division, u Bah A. Nongbri, u Block Development Officer ka Mairang C&RD Block, u Bah V Swer, u Chief Operating Officer ka Meghalaya State Rural Livelihood Society (MSRLS), Shillong, u Bah Ronald Kynta, ki nongtrei jong ki tnat sorkar bapher bapher, ki nongialam shnong ka thain bad  ki dkhot jong ki Village Organisation (VO) bad SHG bapher bapher hapoh ka Mairang Block. (SDPRO, Mairang)