Pynlong u CEO da ka ‘Juggle the Football’ ha Jowai shibynta ban pynshai sha ki nongthep vote

Syllad | The Rising MeghalayaApril 10, 2024

U Chief Electoral Officer (CEO) ka Meghalaya ha ka 9 tarik mynta u bnai u la pynlong da ka jingiakop ‘Juggle the Football’ ha sor Jowai khnang ban pyniadon bynta ia ki samla shibynta jong ka prokram jingpynshai sha ki paidbah nongthep vote.

 Ia kane ka ‘Juggle the Football’ competition la pynlong hapoh Chutwakhu Club, kaba dei ka socio-cultural and sports club ha Jowai  kaba la kynjoh 100 snem.

U Dr. B.D.R. Tiwari uba dei u Chief Electoral Officer (CEO) ka Meghalaya u la ong namar ba ki samla ki dei kiba ieit ia ka jingialehkai football, kumta ruh la shim ia ka rai ban pyniadon bynta bad ki na ka bynta ki jingpynshai sha ki paidbah nongthep vote lyngba ka jingialehkai football.

“Ka dei ka sienjam kaba khraw shibun ban pyniadon bynta bad ki samla jong ka sor Jowai,” ong u Bah Risly Passah, Chairman (Sports) jong ka Chutwakhu Sports Club.U Bah Passah u la ai khublei ruh ia u CEO ka Jylla halor ka jingjied ia ka Chutwakhu Club na ka bynta ban pynlong ia kane ka ‘Juggle the Football.’

Ha kane ka sngi la ia don lang ruh ki nongialam ba la rim jong ka Chutwakhu Sports Club.

Baroh ki la don haduh khyndai tylli ki club napoh Jowai kiba la wan iashim bynta ha kane ka jingiakop ha kaba ki nong jop ki la ioh pdiang ia ki ‘Golden Boots’ bad kiwei pat ki jingai sngewbha, kata kynthup ia ki branded football ia kiba la shna kyrpang ban kyntiew bad pynshai sha ki nongthep vote na ka bynta kane ka Lok Sabha Ilekshon ka ban long ha ka 19 tarik mynta u bnai ha kane ka Jylla.

Ia kawei pat ka jingialehkai ‘Juggle the Football’ la pynlong da u CEO Meghalaya ha ka sngi Nyngkong ba la lah ha Smit ha ryngkat ka jingiatreilang bad ka Smit Football Club lem bad ka Seng Samla Shnong. Ia kiba kum kine ki jingialehkai yn pynlong ruh hapoh ki district ha Garo Hills.