Pynlong workshop ka Kiang Nangbah Government College halor ka SWAYAM Course

Syllad | The Rising MeghalayaApril 30, 2024

Ka Kiang Nangbah Government College, Jowai ha ryngkat ka jingiatreilang bad ka SWAYAM MOOCs NEHU, Shillong ka la pynlong ia ka workshop ba shi sngi halor ka phang “Implementation of SWAYAM Courses” ha ka prokram ba la pynlong ha ka 23 tarik mynta u bnai hapoh ka Multipurpose Hall jong ka College.

La pynlong ia kane ka workshop hapoh ka jingkhmih bad jingpynbeit da ka IQAC bad NEP/CUET/NCTE CELL jong ka Kiang Nangbah Government College, Jowai da ka jingthmu ban kyntiew ha ka liang ka pule puthi lyngba ka rynsan SWAYAM MOOCs ba la wanrah da ka Ministry of Education, India bad ka NPTEL ban kyntiew ia ki jingpule kiba kham shalor ha ki jaka pule kiba don ha ka thain  East bad West Jaintia Hills District.

La pyniaid ia kane ka prokram da ka Dr. (Mrs) S. Kharbhih, Assistant Professor, Department of Botany, Kiang Nangbah Government College, ha kaba la wan ban iashim bynta da ki nonghikai na ki college bapher bapher kiba don ha ka thain East bad West Jaintia Hills, kata kynthup ia ka Kiang Nangbah College, Jowai Thomas Jones College, Jowai, Shangpung College, Shangpung, Amwi College, Jowai, Jaintia Eastern College, Khliehriat, Nongtalang College, Nongtalang, Don Bosco College, Byndihati bad Ummulong Presbyterian College, Ummulong.

La sdang ia kane ka prokram da ka jingpdiang ia ki nongshah khot sngewbha kaba kynthup ia u. Shailendra K. Singh, MOOCs Chairman, NEHU bad I Dr. (Mrs) Quendarisa Kharbuli, SWAYAM Co-Ordinator NEHU, Shillong kiba dei ki  Resource Persons ha kane ka workshop.

U Dr JP Sharma, IQAC Coordinator, KNGC u la ai ia ka jingkren kaba pynioh mynsiem ha kaba iadei bad ka jingpynioh ia ki lad jingpule kiba bha bad paka bad ia kiba lah ban pynioh khlem da donkam jingsiew na ka bynta baroh ki samla pule. U la ong ruh ba ka jingthmu jong kane ka workshop ka long ban weng ia ki jingeh hapdeng ki conventional system of education bad modern digital learning environment kiba tyrwa ban pynioh ia ki lad jingpule ha kano kano ka por bad sha kino kino ki jaka.

U la kdew ruh ba ka jingpyntreikam ia ka SWAYAM MOOCs ha baroh ka thain East bad West Jaintia Hills kan long ka jingkyrkhu kaba khraw ia ki samla pule tjon ka thain ba kin ioh ia ki lad ban pule ha ki lain bapher bapher kaba plielad ia ki samla pule ba kin ioh ban jied ia sobjek kiba thymmai kumjuh ia ki lad jinghikai kiba thymmai kiba kham pynleit jingmut ha ka liang ki jingpynshai bad ki jingiamir jingmut.

U Moderator jong ka prokram u  Dr. BR Suchiang, Assistant Professor, Department of Botony u la pynpaw halor ka bynta kaba kongsan bad halor ka jingpyntreikam ia ka MOOCs hapoh ka rynsan SWAYAM bad halor ki sienjam ba la shim da ka college ban ai jingpynshai halor ki prokram jong ka MOOCs bad ABC ki ban kyntiew ia ki jingtip hapdeng ki nonghikai ban pyndonkam ia ki jingstad teknologi ha ki jingai jinghikai.

Nalor kata la pynkhreh ia kane ka workshop ha ka rukom ban wanrah ia ki jingiamir jingmut, ban pynpaw ia ki jingai jingmut bad ki lad jingiatreilang na ka bynta ban pyniaid shakhmat ia ki  SWAYAM MOOCs course hapoh ki college. Lyngba ki resource person, u Prof. Shailendra K Singh, MOOCs Chairman, NEHU bad ka  Dr. (Mrs) Quendarisa Kharbuli, SWAYAM Co-Ordinator NEHU, Shillong, ki la pynpaw ia ki jingshem bad ki jingpyrshang ba bha tam jong ki ban pynthikna halor ka jingseisoh ha ka jingpyntreikam ia kine ki lain jingpule ne courses hapoh jong ka SWAYAM.

Na ka liang u Professor Singh u la pyrto ia ki sienjam ba la shim da ka college ban lamkhmat ha kaba pynlong ia kaba kum kane ka workshop kaba kyrpang bad ba ka KNGC, Jowai ka dei ka college kaba nyngkong eh ha Meghalaya ka ban shim ia kane ka sienjam ban pynlong ia kaba kum kane ka prokram.

Shuh shuh u Professor Singh u la kren ruh ha kaba iadei bad ka NEP 2020 bad halor ki laitylli ki Mantra jong ka NEP, kata ba dei ban pynkylla ia ka India kum ka jaka pule puthi jong ka pyrthei bad ruh ban kyntiew kum ka ri ba khrawbor ha ka liang ka teknologi. U la kdew ruh halor ki laitylli ki mantra jong ka MOOCs, kata ka jingpdiang, ka jingpyntreikam bad ka jingkyntiew. Nalor kata ula pynpaw ruh halor ki artylli ki jait course hapoh jong ka NEHU regulation kata ka Credit bad ka Non credit courses kiba hap hapoh jong ka NEP.

Ha kaba kut hong ka session, ki nongiashim bynta ki la ioh ia ka lad ban iamir jingmut lang da kaba pynpaw ruh ia la ki jong ki jinshem bad ih ruh ia ki jingpynshai halor ki jingartatien ki jong ki.